Tanymal sýretshi Ibragım Kýbekov dúnıe saldy

2025 jylǵy 2 maýsymda tanymal qazaqstandyq grafık-sýretshi, karıkatýrashy Ibragım Kýbekov qaıtys boldy, dep habarlaıdy Qandastar.kz aqparat portaly.

Bul týraly 3 maýsym kúni onyń uly Evgenıı Kýbekov Facebook paraqshasynda jazdy:

«Keshe Býrgas qalasynda ákem Ibragım Kýbekov ómirden ótti degen qaıǵyly habardy jetkizemin», – dep jazdy ol.

Ibragım Kýbekov — qazaqstandyq sýretshi-grafık, karıkatýrashy, baspager. 1957 jyly Ýkraın KSR-iniń Voroshılovgrad (qazirgi Lýgansk) qalasynda dúnıege kelgen. 1960-jyldardyń basynan bastap Almaty qalasynda ómir súrip, eńbek etti. 1978–1982 jyldary Abaı atyndaǵy Qazaq pedagogıkalyq ınstıtýtynyń kórkemsýret-grafıka fakýltetinde bilim aldy.

1980-jyldardyń sońynan bastap qyryq jylǵa jýyq merzim boıy gazet grafıkasy salasynda jumys istedi. Onyń sharjdary men karıkatýralary «Drýjnye rebıata», «Karavan», «Megapolıs», «Kovcheg», «Informbıýro» syndy basylymdarda jaryq kórdi. KSRO jáne halyqaralyq karıkatýra baıqaýlaryna qatysyp, júldeger atandy. Shyǵarmalary Qazaqstannyń iri mýzeıleri men kórme zaldarynda qoıylǵan.