تارازدا كوپبالالى انا سوتتا 5 بانكتى جەڭىپ شىقتى

فوتو: istockphoto.com

تارازدا بەس بانكتەن 6 ملن تەڭگەنىڭ دۇنيەسىن نەسيەگە العان ايەل ونى تولەي الماي, سوتقا جۇگىنگەن, دەپ حابارلادى qandastar.kz

سوتتىڭ اقپاراتىنشا, ايەلدىڭ كامەلەت جاسىنا تولماعان ءتورت بالاسى بار. جولداسىمەن زاڭدى نەكە قيدىرماعان. ءوزى جەرگىلىكتى جشس-لاردىڭ بىرىندە وپەراتور بولىپ جۇمىس ىستەيدى.

«ايەلدىڭ جالاقىسى 220 مىڭ تەڭگە, ال اي سايىنعى نەسيەسىنىڭ تولەمى 395 مىڭ تەڭگە بولعان. ول بەس بانكتەن التى ميلليون تەڭگە قارىز العان», — دەپ حابارلايدى سوت.

جالاقىسى اي سايىنعى تولەمىنەن ەكى ەسەدەي از ايەل اي سايىنعى تولەمىن ازايتۋ ءۇشىن بانكتەرگە ءوتىنىش جاساعان. الايدا ولار باس تارتقان كورىنەدى. سوندىقتان, ايەل سوتقا جۇگىنگەن.

«تالاپ ارىزىندا ول نەسيەلىك جۇكتەمەنىڭ شامادان تىس ەكەنىن كورسەتىپ, اي سايىنعى تولەمدەردى ازايتا وتىرىپ, قارىزدى وتەۋ مەرزىمىن 60 ايعا دەيىن ۇزارتۋدى سۇراعان. بەس كرەديتوردىڭ تورتەۋى تالاپ قويۋدى قاناعاتتاندىرۋعا قارسى بولعان. الايدا, تاراز قالالىق سوتى تالاپ قويۋشىنىڭ ۋاجدەرى ءىس ماتەريالدارىمەن تولىقتاي راستالعان, ونىڭ ارەكەتىندە ارام پيعىلدىڭ بەلگىلەرى جوق دەگەن قورىتىندىعا كەلگەن. سوت ايەلدىڭ تالابىن قاناعاتتاندىرىپ, تولەم قابىلەتتىلىگىن قالپىنا كەلتىرۋ ءتارتىبىن قولداندى, وعان سايكەس قارىز 5 جىل بويى اي سايىن وتەلەدى», — دەپ حابارلايدى سوت.

turkystan.kz جازعانداي, سوت شەشىمىنە ەكى كرەديتور بانك تاراپىنان شاعىم ءتۇسىرىپتى. الايدا, جامبىل وبلىستىق سوتى شەشىمدى وزگەرىسسىز قالدىردى.