تاريحي رەكورد: ەلىمىزدە ايىپپۇل مولشەرى 300 ملرد تەڭگەدەن استى

فوتو: اشىق دەرەككوز

2024 جىلعى اكىمشىلىك ايىپپۇلداردىڭ جالپى كولەمى العاش رەت 300 ميلليارد تەڭگەدەن استى. اكىمشىلىك قۇقىقبۇزۋشىلىقتار سانى 40%-عا جۋىق ءوسىپ, 10,9 ميلليوننان 15,1 ميلليونعا دەيىن جەتتى. بۇل تۋرالى قوعامدىق بەلسەندى ديدار سماعۇلوۆ الەۋمەتتىك جەلىدە جازدى, دەپ حابارلايدى qandastar.kz

ونىڭ سوزىنشە, بۇل ءوسىم 2016 جىلدان باستاپ 8 جىل بويى جالعاسىپ كەلەدى, بىراق تەك بىلتىر 4 149 480 حاتتاما تولتىرىلىپ, كورسەتكىش كۇرت وسكەن.

ديدار سماعۇلوۆتىڭ سوزىنشە, ايىپپۇل سالۋدىڭ باستى ماقساتى – قايتالاناتىن قۇقىقبۇزۋشىلىقتاردىڭ الدىن الۋ جانە ەسكەرتۋ. بىراق ءبىزدىڭ ايىپپۇل جيناۋشى سالا تۇراقتى تۇردە بيۋدجەتتى تولىقتىرۋدىڭ «ۇدەمەلى» كوزىنە اينالىپ كەتكەندەي.

مەنىڭشە, مەملەكەت ءوز ازاماتتارىن قورقىتقانشا, ۇرلىقتى توقتاتىپ, بيۋدجەت قاراجاتىن ماڭىزى جوق نارسەلەرگە ەمەس, حالىقتىڭ يگىلىگىنە جۇمساعانى دۇرىس. ەگەر بۇل ءۇردىس جالعاسا بەرسە, وندا ءبىر جىلدان كەيىن ايىپپۇلدار سانى ەلدەگى حالىق سانىنان اسىپ كەتەدى: ياعني ءاربىر نارەستە تۋعان ساتتەن باستاپ ايىپپۇل تولەيتىن بولادى, دەپ جازدى ول.

Malim.kz. حابارلاعانداي, قوعامدىق بەلسەندى ءسال كىدىرىس جاساپ, باسقارۋ تاسىلدەرىن قايتا قاراپ شىعۋ كەرەك ەكەنىن ايتادى. ويتكەنى مۇنداي قاتاڭ شارالار ەش جەردە جوق.

مىسالى, ەركىن دەپ تە, دەموكراتيالى دەپ تە ونشا سانالمايتىن رەسەيدە 143,8 ميلليون حالىق بار, 2023 جىلى سوتتاردا قارالعان اكىمشىلىك قۇقىقبۇزۋشىلىقتاردىڭ سانى بار بولعانى 6,14 ميلليون. ەگەر سوتتان تىس ايىپپۇلداردى قوسىپ ەسەپتەسەك, بۇل ءبارىبىر بىزدەگى «كورسەتكىشكە» جەتپەيدى, دەيدى ديدار سماعۇلوۆ.