Tarıhı rekord: elimizde aıyppul mólsheri 300 mlrd teńgeden asty

Foto: ashyq derekkóz

2024 jylǵy ákimshilik aıyppuldardyń jalpy kólemi alǵash ret 300 mıllıard teńgeden asty. Ákimshilik quqyqbuzýshylyqtar sany 40%-ǵa jýyq ósip, 10,9 mıllıonnan 15,1 mıllıonǵa deıin jetti. Bul týraly qoǵamdyq belsendi Dıdar Smaǵulov áleýmettik jelide jazdy, dep habarlaıdy qandastar.kz

Onyń sózinshe, bul ósim 2016 jyldan bastap 8 jyl boıy jalǵasyp keledi, biraq tek byltyr 4 149 480 hattama toltyrylyp, kórsetkish kúrt ósken.

Dıdar Smaǵulovtyń sózinshe, aıyppul salýdyń basty maqsaty – qaıtalanatyn quqyqbuzýshylyqtardyń aldyn alý jáne eskertý. Biraq bizdiń aıyppul jınaýshy sala turaqty túrde bıýdjetti tolyqtyrýdyń «údemeli» kózine aınalyp ketkendeı.

Menińshe, memleket óz azamattaryn qorqytqansha, urlyqty toqtatyp, bıýdjet qarajatyn mańyzy joq nárselerge emes, halyqtyń ıgiligine jumsaǵany durys. Eger bul úrdis jalǵasa berse, onda bir jyldan keıin aıyppuldar sany eldegi halyq sanynan asyp ketedi: ıaǵnı árbir náreste týǵan sátten bastap aıyppul tóleıtin bolady, dep jazdy ol.

Malim.kz. habarlaǵandaı, qoǵamdyq belsendi sál kidiris jasap, basqarý tásilderin qaıta qarap shyǵý kerek ekenin aıtady. О́ıtkeni mundaı qatań sharalar esh jerde joq.

Mysaly, erkin dep te, demokratııaly dep te onsha sanalmaıtyn Reseıde 143,8 mıllıon halyq bar, 2023 jyly sottarda qaralǵan ákimshilik quqyqbuzýshylyqtardyń sany bar bolǵany 6,14 mıllıon. Eger sottan tys aıyppuldardy qosyp eseptesek, bul báribir bizdegi «kórsetkishke» jetpeıdi, deıdi Dıdar Smaǵulov.