تاريحتا بولماعان قاۋىپ: 16 ميلليارد قۇپياسوز تارالىپ كەتكەن

Apple, Google, Facebook, GitHub, Telegram, ءتىپتى مەملەكەتتىك پلاتفورمالارعا دەيىن – بارلىعىنىڭ قۇپياسوزدەرى ينتەرنەتكە تاراپ كەتتى. زەرتتەۋشىلەر 16 ميلليارد لوگين مەن ءپارولدىڭ اۋقىمدى بازاسى جاريا بولعانىن راستادى. بۇل ينتەرنەت تاريحىنداعى ەڭ كوپ دەرەكتىڭ تارالۋى سانالىپ وتىر, دەپ حابارلايدى qandastar.kz forbes.com-عا سىلتەمە جاساپ.

Cybernews زەرتتەۋشىلەرى دەرەتەردىڭ تارالۋىن جىل باسىنان بەرى باقىلاپ كەلگەن. ولاردىڭ ايتۋىنشا, ارقايسىسىندا ونداعان ميلليوننان 3,5 ميللياردقا دەيىن جازبالار بار 30-عا جۋىق دەرەكتەر جيىنتىعى تابىلعان. جالپى سانى – 16 ميلليارد.

قۇپياسوزدىڭ جاريا بولۋى – اككاۋنتتىڭ بۇزىلۋىنا, ال اككاۋنتتىڭ بۇزىلۋى بانك كارتالارىڭىزدان باستاپ جەكە حاتتارىڭىزعا دەيىن ءبارىنىڭ قاۋىپكە تۇسۋىنە الىپ كەلەدى. سول سەبەپتى Google ميللياردتاعان قولدانۋشىنى قۇپياسوزدىڭ ورنىنا قاۋىپسىزرەك passkey-گە كوشۋدى ۇسىنۋدا. ال FBI قولدانۋشىلارعا SMS ارقىلى كەلگەن سىلتەمەلەرگە باسپاۋعا كەڭەس بەرىپ وتىر.

قۇپياسوزدەرىڭىزدى شۇعىل اۋىستىرىڭىز. ءار ءتۇرلى پلاتفورمادا بىردەي قۇپياسوز قولدانۋدان باس تارتىڭىز. ەكى فاكتورلى اۋتەنتيفيكاتسيانى قوسىڭىز. قۇپياسوزدەردى ساقتاۋ ءۇشىن سەنىمدى مەنەدجەر قولدانىڭىز (مىسالى, 1Password, Bitwarden).

مامانداردىڭ پايىمداۋىنشا, مۇنداي اۋقىمدى اعىپ كەتۋگە بىرنەشە ينفوستيلەر – ياعني, جەكە دەرەكتەردى ۇرلايتىن زياندى باعدارلامالار سەبەپ بولعان. بۇل قۇرالدار پايدالانۋشىنىڭ قۇرىلعىسىنان لوگيندەر مەن قۇپياسوزدەردى اۆتوماتتى تۇردە ۇرلاپ, كەيىن ولاردى قارا نارىقتا ساتادى.