جاڭالىقتار
تاۋەلسىز Orda.kz سايتىن كىم قۇرىقتاماق? باس رەداكتور گۇلنار باجكەنوۆانى شەتقاقپايلاۋ كىمگە ءتيىمدى?
Orda.kz رەداكتسياسى مەن باس رەداكتور گۇلنار باجكەنوۆا جارتى جىلدان بەرى قۋدالاۋعا, قوقان-لوقى مەن ۇنەمى بولاتىن قىسىمعا ۇشىراپ كەلەدى. ءبىزدىڭ قىزمەتكەرلەرىمىز تۇراتىن جەرگە بەيتانىس ادامدار كەلىپ, وزدەرىن پوليتسيا قىزمەتكەرى رەتىندە تانىستىرىپ, كورشىلەردەن سۇراق-جاۋاپ الىپ, جاساندى سۋرەتتەردى كورسەتىپ, ءجۋرناليستىڭ ىزدەۋدە جۇرگەنىن ايتىپ كەتكەن جاعدايلار دا تىركەلىپ جاتىر, دەپ جازدى Orda.kz qandastar.kz-كە سىلتەمە جاساپ.
رەداكتسيا قىزمەتكەرلەرىنىڭ جەكە تەلەفون نومىرلەرى OLX باعدارلاماسى جارنامالارىندا ءورىپ ءجۇر. مىسالى, تۇرمىستىق تەحنيكا, ساتىلاتىن كۇشىكتەر مەن مىسىقتار, سونداي-اق شەتەلدەگى جىنىستىق قىزمەت تۋرالى جالعان حابارلاندىرۋلاردا قىزمەتكەرلەرىمىزدىڭ نومىرلەرى كورسەتىلگەن. بۇل نومىرلەر اۆتوسالوندار, مەديتسينالىق ورتالىقتار, داعدارىس ورتالىقتارى مەن باسقا دا كوممەرتسيالىق ۇيىمداردىڭ بايلانىس ءنومىرى رەتىندە دە كورسەتىلىپ جاتىر. سونىڭ سالدارىنان قىزمەتكەرلەر تاۋلىك بويى قوڭىراۋ مەن حابارلامالاردىڭ استىندا قالدى. بۇل ماسەلە ارىپتەستەرىمىزدىڭ جۇمىسىنا كەدەرگى كەلتىرىپ, جەكە ءومىرىنىڭ شىرقىن بۇزدى.
جۋرناليستەردىڭ اتى-ءجونى مەن فوتوسۋرەتتەرىن پايدالانىپ, الەۋمەتتىك جەلىدە جالعان پاراقشالار دا اشىلدى. ولاردىڭ اتىنان جالعان اقپارات جاريالاندى. ءتىپتى, باس رەداكتور گۇلنار باجكەنوۆانىڭ قايتىس بولعانى جونىندە جالعان مالىمدەمە جاريالاندى.
جاسىرىن چاتتاردا جۋرناليستەردىڭ دەنساۋلىعى مەن ومىرىنە قاۋىپ توندىرەتىن قوقان-لوقى ايتىلىپ جاتىر.
سونىمەن قاتار «وردا» رەداكتسياسىنىڭ الەۋمەتتىك جەلى پاراقشالارىنا سپام-شابۋىلدار جاسالدى. ەش نەگىزسىز شاعىمداردىڭ كەسىرىنەن TikTok پەن Facebook پاراقشالارى بۇعاتتالدى. Instagram پاراقشاسى ەكى رەت بۇعاتتالىپ, تەك Meta كومپانياسى ارالاسىپ, اقپاراتتاردى سارالاعان سوڭ قايتا اشىلدى. وسى اپتادا باس رەداكتورىمىزدىڭ جەكە پاراقشاسى بۇزىلىپ, حاكەرلەر شابۋىل جاسادى.
وسى وقيعالاردىڭ ءبارىن رەداكتسيا بۇعان دەيىن دە جاريالاعان ەدى. ەندى قۇقىق قورعاۋ ورگاندارىنا رەسمي ءوتىنىش دايىنداپ جاتىر. الايدا بۇل ىستە ءادىل تەرگەۋ جۇرگىزىلە قويادى دەگەن ءۇمىت از.
بىزگە قارسى ۇيىمداستىرىلىپ جاتقان بۇل شابۋىلداردىڭ ارتىندا قولىندا بيلىگى بار, اكىمشىلىكتەگى رەسۋرستارعا قولى جەتەتىن, قارجىسى مەن ىقپالى بار ادامدار تۇرعانى انىق. «وردا» رەداكتسياسى ەشبىر بۇعاۋعا كونبەگەن سوڭ, جۋرناليستەرىمىزدى قۋعىنداپ, قورقىتا باستادى. جوعارىدا ايتقان شابۋىلداردىڭ ءبارى سودان باستالدى.
تاۋەلسىز اقپارات قۇرالىنا ۇستەمدىك جۇرگىزۋ ءۇشىن بارىنشا ارەكەت ەتكەن كەيبىر كۇشتەر اقىرى باس رەداكتوردان «وردانى» وزگە «تاۋەلسىز» مەديالار شوعىرلانعان بىرىڭعاي ورتالىققا وتكىزۋدى تالاپ ەتكەن. بۇل تالاپتان باس تارتىلعاننان كەيىن, باسىلىمدى رەيدەرلىك جولمەن تارتىپ الۋ, ياعني زاڭدى تۇلعانى كۇشپەن يەمدەنۋ ارقىلى رەداكتسيانى باسىپ الۋ جوسپارى ىسكە قوسىلدى.
مۇنداعى ماقسات – «OrdaMedia.kz» جشس-ءنىڭ نەگىزىن قالاۋشىسى, باس رەداكتورى جانە باس ديرەكتورى گۇلنار باجكەنوۆانى شەتقاقپايلاپ, ىقپالدى اقپارات قۇرالىن اشسا الاقاندارىندا, جۇمسا جۇدىرىقتارىندا ۇستاۋ.
بۇل قاستىقتى كىم ۇيىمداستىرىپ وتىر? قازاقستانداعى مەدياكەڭىستىكتى كىم باقىلاۋعا العىسى كەلەدى? تاۋەلسىز باق-تار كىمنىڭ جولىنا كەسە كولدەنەڭ تۇردى? قازاقستاندا كاندەلاكي مەن سيمونيان سياقتى بولعىسى كەلەتىندەر كىمدەر?
قادىرلى وقىرمان, وسى سۇراقتاردىڭ جاۋابىن ءبىز الداعى ءباسپاسوز ءماسليحاتىندا اشىق ايتىپ بەرۋدى ءجون كوردىك.
رەداكتسيا ءباسپاسوز ءماسليحاتى وتەتىن كۇن مەن ۋاقىتىن الدىن-الا قوسىمشا حابارلايدى.
