تاياۋ شىعىستا احۋال: قازاقستاندىقتار دۋبايدان شۇعىل تۇردە ەلگە ورالدى

فوتو: ۆيدەودان سكرينشوت

تاياۋ شىعىستا احۋال كۇردەلەنگەن سوڭ, 300-دەن استام قازاقستاندىق تۋريست دۋبايدان الماتىعا ارنايى رەيستەرمەن جەتكىزىلدى, دەپ حابارلايدى Skifnews.kz اقپارات پورتالى.

FlyDubai اۋە كومپانياسىنىڭ ەكى ۇشاعى 15 ماۋسىمدا تۇنگى ساعات 02:45 پەن 06:19-دا الماتى حالىقارالىق اۋەجايىنا قوندى. بورتتا بارلىعى 332 جولاۋشى بولعان. ولاردىڭ اراسىندا 13 ماۋسىمدا ۇشۋى ءتيىس بولعان, بىراق رەيسى شەگەرىلگەن ازاماتتار دا بار.

بەلگىلى بولعانداي, ايماقتا جاعدايدىڭ بىردەن شيەلەنىسۋىنە بايلانىستى بىرنەشە حالىقارالىق تاسىمالداۋشى دۋباي مەن ابۋ-دابيدەن قاتىنايتىن رەيستەردى ۋاقىتشا توقتاتۋعا ءماجبۇر بولدى.

قر كولىك مينيسترلىگىنە قاراستى ازاماتتىق اۆياتسيا كوميتەتى 13 ماۋسىمنان باستاپ يران, يزرايل, سيريا, يراك, يوردانيا جانە ليۆان اۋماعىندا جانە ولاردىڭ اۋە كەڭىستىگىندە ۇشۋعا تىيىم سالعانىن حابارلادى.

FlyDubai رەيستەرى قاۋىپسىز باعىتپەن ۇشىپ, تەك كىدىرگەن جولاۋشىلاردى عانا ەمەس, جوسپارلى تۇردە ۇشۋعا ءتيىس ازاماتتاردى دا قازاقستانعا ءدىن امان جەتكىزدى.