Tek eske alý emes, sonymen qatar ulttyq rýhymyzdyń sımvoly – Prezıdent Astanadaǵy Jeńis parady týraly

Foto:Aqorda

Memleket basshysy Qasym-Jomart Toqaev 2025 jylǵy 24 sáýirde Qazaqstan halqy Assambleıasynyń XXXIV sessııasynda sóılegen sózinde Astanada ótetin Jeńis sherýi týraly aıtty, dep habarlaıdy qandastar.kz Zakon.kz-ke silteme jasap.

Prezıdent eki aptadan keıin álemdik mańyzy bar tarıhı oqıǵa – Uly Jeńiske 80 jyl tolady. Biz bul mereıtoıdy keń kólemde atap ótemiz dedi.

«Qazaqstannyń maıdangerleri men tyl eńbekkerleri – barsha halqymyz Otan úshin otqa tústi. Uly Jeńistiń taǵylymy barsha halyqqa, ásirese, saıasatkerlerge ksenofobııaǵa, násildik jáne ulttyq ústemdikke, halyqaralyq quqyq qaǵıdattaryn qurmettemeýge qurylǵan jaýapkershilikten jurdaı saıasat júrgizýdiń saldary qandaı qasiretke ákeletinin áli kúnge deıin kórsetip otyr.» Qasym-Jomart Toqaev

Birer kún buryn meniń tapsyrmammen Respýblıkalyq onomastıkalyq komıssııa eldi mekenderdegi 500-den astam kóshege buǵan deıin eleýsiz qalǵan jergilikti qaharmandardyń esimin berý týraly sheshim qabyldady.

«Eń aldymen, jańa jáne ataýy qaıtalanatyn kóshelerge basymdyq beriledi. Bul sheshim – Uly Jeńisti, oǵan qatysýshylardy qanshalyqty qadir tutatynymyzdy kórsetetin mańyzdy qadam. Uly Jeńis týraly umytpaý degenimiz, bul – eń aldymen, erjúrek batyrlarymyzdy jadymyzda saqtaý, olardyń janqııarlyq eńbegi men erligin, paryzǵa adal jáne antqa berik bolǵanyn umytpaý degen sóz. Biz sol surapyl soǵys kezinde teńdessiz batyrlyq pen batyldyq kórsetken otandastarymyzdy árdaıym orasan zor qurmetpen este saqtaımyz.» Prezıdent

Prezıdent Jeńistiń 80 jyldyǵyna daıyndyq týraly osydan bir jarym jyl buryn aldyn ala aıtqan.

«Soǵan sáıkes biz «Uly Jeńis: erlikke taǵzym, urpaqqa úlgi» josparyn arnaıy qabyldap, júzege asyra bastadyq. Osy aýqymdy jumystyń aıasynda eki myńnan astam mádenı, ǵylymı-zertteý, aǵartý jáne basqa da is-sharalar ótkiziledi. Eń bastysy, árıne, memleket pen qoǵamnyń erekshe qorǵaýynda bolatyn qurmetti ardagerlerimizge aıryqsha kóńil bólemiz. Uly Jeńistiń mereıli datasyn atap ótýge arnalǵan is-sharalar legi aýqymdy áskerı sherýge ulasady. Túptep kelgende, bul áskerı sherýdiń mán-mańyzy zor bolmaq. Sebebi muny bir jaǵynan maıdangerler men tyńgerlerge taǵzym desek, ekinshi jaǵynan qazirgi kúrdeli geosaıası ahýalda ulttyq rýhymyzdyń myqtylyǵyn kórsetetin sımvol deýge bolady». Memleket basshysy