TikTok-تا رۋلاردى جارىستىراتىندار كوبەيدى: بۇل زاڭدى ما

كوللاج: ulysmedia.kz.

TikTok الەۋمەتتىك جەلىسىندە قازاقتىڭ رۋلارىن ءتىزىپ جازىپ, جارىس وتكىزەتىندەر كوبەيدى, دەپ جازادى Ulysmedia.kz.

رۋلاردى قالاي جارىستىرادى

اتالعان الەۋمەتتىك جەلىدە ءبىر ەمەس, بىرنەشە قولدانۋشى رۋلار جارىسىن وتكىزىپ, تابىس تاۋىپ وتىر. ويىن ەرەجەسى وڭاي: رۋلاردىڭ ءتىزىمى كەلتىرىلەدى. كىم رۋىنىڭ اتىن جازىپ, كاسپي بانك نومىرىنە اقشا جىبەرسە, سول رۋدىڭ ەسىمىن جوعارى قويادى. پىكىر قالدىراتىن جەردە ادامدار كەيدە ءبىر-بىرىمەن ەرەگەسىپ, داۋلاسىپ وتىرادى.

بۇل زاڭمەن قۋدالانۋى مۇمكىن بە

Ulysmedia.kz تىلشىسى “بۇل زاڭمەن قۋدالانۋى مۇمكىن بە? ەلدەگى ءترايباليزمدى كۇشەيتەر كورىنىسى بار ما?” دەگەن سۇراققا جاۋاپ ىزدەپ زاڭگەرلەرگە قوڭىراۋ شالىپ كورگەن.

ادۆوكات ايجان دارىباەۆا بۇل جاعدايدان زاڭعا قايشى ارەكەت كورمەيدى.

– مورالدىق تۇرعىدا باعا بەرمەي-اق قويايىن, الايدا زاڭدى تۇرعىدا جاۋاپكەرشىلىككە تارتۋ مۇمكىن ەمەس دەپ ويلايمىن, ويتكەنى ازاماتتار ءوز ەركىمەن اقشاسىن جىبەرىپ جاتىر, – دەيدى زاڭگەر.

دەگەنمەن, بۇعان بالاما پىكىر بار. تاعى ءبىر زاڭگەر اقشانى تەك كوممەرتسيالىق ەمەس ۇيىمدار قايىرىمدىلىق ماقساتپەن جيناي الاتىنىن ەسكەرتەدى.

مەمورگاندارعا ساۋال

مادەنيەت جانە اقپارات مينيسترلىگى بۇل ارەكەتتەرگە قالاي باعا بەرەدى? مينيسترلىكتىڭ يدەولوگيالىق جۇمىسىنا جاۋاپتى ءبولىمى تاراپىنان قۇزىرلى ورگاندارعا وسى جايتتار جونىندە قانداي دا ءبىر ۇسىنىم, وتىنىمدەر جاسالا ما? ىشكى ىستەر مينيسترلىگى جوعارىدا اتالعان ارەكەت زاڭعا قايشى ارەكەتت دەپ ەسەپتەي مە?

وسى ساۋالداردى Ulysmedia.kz جاۋاپتى ورگاندارعا جولدادى. جاۋاپ كەلگەندە بىردەن جاريالانادى.