«Til-Qazyna» sheteldegi qandastar úshin til meńgerýdiń jańa jolyn usyndy

Foto: ashyq derekkóz

Ǵylym jáne joǵary bilim mınıstrligi Til saıasaty komıtetiniń tapsyrysymen «Til-Qazyna» UǴPO-ǵy Abai.institute jobasy aıasynda qazaq tilin meńgerýdiń jańa joldaryn usynady. Sheteldegi qandastar men qazaq tiline qyzyǵýshylyq tanytqan azamattarǵa arnalǵan bul beınesabaqtar kez kelgen jastaǵy til úırenýshiler úshin yńǵaıly ári qoljetimdi, dep jazdy qandastar.kz

Beınesabaqtardyń basty ereksheligi – kez kelgen ýaqytta oqýǵa bolady. Til úırenýshi dáristerdi onlaın formatta, yńǵaıly ýaqytta oqı alady. Ár taqyryp 10 mınýtta qysqa ári naqty túsindiriledi. Qazirgi kezde A1, A2 (bastapqy deńgeıler) boıynsha 40 sabaq qoljetimdi. Ázirlengen beınedárister ámbebap ádisteme negizinde jasalǵan. Iaǵnı qazaq tilin ózge tildiń kómeginsiz úıretýge arnalǵan bul tásil álemniń túkpir-túkpirindegi til úırenýshilerge tıimdi. Tildik ortaǵa boılaý ádisi álemde moıyndalǵan eń tıimdi til úıretý tásili sanalady.

Beınesabaqtar tildi keshendi túrde úıretýge baǵyttalǵan:

• Tyńdalym, aıtylym, jazylym, oqylym daǵdylaryn damytý;
• Kúndelikti ómirge qajetti sózdik qor men grammatıkalyq qurylymdardy meńgerý;
• Qazaq mádenıeti men salt-dástúri týraly tanymdyq aqparat usynýǵa negizdelip jasalǵan.

Ár sabaq deńgeılik taqyrypqa saı eki bólimnen turady. Birinshi bólimde teorııa túsindirilse, ekinshi bólimde materıal epızodtyq kórinister arqyly beriledi.

Qazirgi tańda qazaq tilin meńgerýge suranys artýda. Sheteldegi qandastar úshin ana tilin meńgerý ulttyq biregeılikti saqtaýdyń joly bolsa, shetel azamattary úshin qazaq tili mádenıetaralyq baılanys ornatýǵa múmkindik beredi. Abai.institute platformasy arqyly usynylǵan beınesabaqtar bul suranysqa jaýap beredi jáne til úırený proesin jeńildetedi.

Beınesabaqtar Abai.institute portalynda jáne TilQazyna YouTube arnasyna júktelgen.