ء«تىل پروبلەماسىن شەشەمىز دەسەك, ءبارىمىز قازاقشا ۇيرەنۋىمىز كەرەك» — ءارتىس نۇرلان قويانباەۆ

بەلگىلى پروديۋسەر جانە تەلەجۇرگىزۋشى نۇرلان قويانباەۆ ءتىل ماسەلەسىنە قاتىستى پىكىر ءبىلدىرىپ, قازاقستاندا ءبارى قازاق ءتىلىن ۇيرەنسە عانا پروبلەمانىڭ شەشىلەتىنىن ايتتى, دەپ حابارلايدى qandastar.kz. 

ulysmedia.kz پاراقشاسىنىڭ پورتالىندا قويانباەۆتىڭ ءتىل ماسەلەسىنە قاتىستى ايتقان پىكىرى جاريالاندى. قويانباەۆ ءوز سوزىندە ءبىر كەزدەرى قازاق تىلىندەگى فيلمدەر شەتتەتىلگەنىن ايتىپ ءوتتى.

ءوز اۋديتورياما جۇمىس ىستەپ كەلە جاتقانىما ءبىراز جىل بولدى. ءبىزدىڭ جاعداي وتە قيىن بولدى. ءبىزدىڭ قازاق كينولار الىنبادى, قازاقشا باعدارلامالار از بولدى. ونىڭ بارىنەن ءبىز ۇندەمەي وتتىك قوي. كەيدە ءوزىن قورعايتىندار “ورىس, اعىلشىن تىلىندە مەديتسينا دامىعان, قازاق تىلىندە الەمدى زەرتتەۋ قيىنداۋ بولادى” دەپ ايتادى. بىراق 3-4 ملن حالقى بار فينليانديا فين تىلىندە, 6 ملن حالقى بار نورۆەگيا ءوز تىلىندە سويلەيدى. ءتىل پروبلەما ەمەس. ءتىل پروبلەماسىن شەشۋدىڭ ءبىر-اق جولى بار – ءبارىمىز قازاق ءتىلىن ۇيرەنۋىمىز كەرەك! بولدى! سوندا عانا شەشىلەدى. ادام ءجۇزۋدى ۇيرەنگىسى كەلەتىنى سەكىلدى الدىنا ماقسات قويا ءبىلۋ كەرەك. “مەن انا ءتىلىم – قازاق ءتىلىن ءبىلۋىم كەرەك” دەۋى ءتيىس, – دەدى ءارتىس.

قويانباەۆ ساياساتقا بارعىسى كەلمەيتىنىن ايتتى.