«Toı – qazaqtyń qazynasy» degen — bıshara sóz»: Jazýshy Qanat Tileýhan kútpegen málimdeme jasady

Jazýshy ári jýrnalıst Qanat Tileýhan qazaq qoǵamynda toılardyń shamadan tys kóbeıip ketkenine nazar aýdardy. Bul týraly ol Instagram paraqshasynda jazdy, dep habarlaıdy Qandastar.kz.

Qanat Tileýhannyń aıtýynsha, «Toı — qazaqtyń qazynasy» degen sóz shyndyqqa janaspaıdy.

«Toı — qazaqtyń qazynasy degen bir bıshara sóz bar. Qaıdaǵy qazyna? Qınalyp tapqan aqshań bir sátte joq bolady. Sosyn qaltań bosap, nesıeń qysyp, taǵy da jetpeı jatady. Bizdiń bala kúnimizde toıdyń eki-aq túri bolatyn — úılený toıy jáne áskerge shyǵaryp salý. Sońǵysy qyzyqty ótetin, tipti shaqyrmasa da barýǵa tyrysatynbyz. Qazir súndet toı, tilashar, 30 jas, 40 jas, 45 jas, 50 jas — qysqasy, túri sansyz. Toıǵa baryp, sharshap qaıtamyn. Soǵan qaramastan, toıhanalar kún saıyn kóbeıip jatyr», — dedi ol.

Jazýshynyń bul pikirine áleýmettik jeli qoldanýshylary ártúrli reakııa bildirdi:

«Ánshilerdiń ǵana qazynasy», «Tolyq kelisemin», «Toı — ysyrap», «Zamannyń ozyǵy da, tozyǵy da bar», «Tamadalar kóńilden shyqpaıdy», «Buryn toıda kedeı de, baı da razy bolatyn, qazir báseke ǵana» degen syndy pikirler qaldyrǵan.

Taqyrypqa akter, Qazaqstannyń eńbek sińirgen qaıratkeri Bekjan Turys ta aralasty. Ol Qanat Tileýhannyń sózine kelispeıtinin jetkizdi:

«Toı — qazaqtyń qazynasy» degendi «bıshara sóz» dep aıtý — ulttyq dástúr men tanymdy ústirt túsinýdiń belgisi. Toıdy kemsitý — tamyrdy qıyp, búr jarǵan báıterekti «nege japyraq jaıdyń» deýmen birdeı. Árıne, búgingi keıbir toılardyń jasandy dańǵaza, ysyrapshyl, daraqy tustary bar. Biraq bul — toıdyń emes, ony uıymdastyrýshylardyń talǵamy men tárbıesine qatysty másele», — dep jazdy ol.