Toqaev: Ádiletti Qazaqstandy kemeńger kósemder emes, qarapaıym eńbekkerler qurady

Foto: gov.kz

Memleket basshysy BAQ qyzmetkerlerin marapattaýǵa arnalǵan jıynda sóılegen sózinde buqaralyq aqparat quraldarynyń qoǵamda zań men tártipti ornyqtyrý úderisinde atqaratyn róli aıryqsha ekenin aıtty, — dep habarlaıdy Tengrinews.kz tilshisi Aqordaǵa silteme jasap.

«Ádiletti Qazaqstandy kemeńger kósemder, ańyzdaǵy qaharmandar emes, qarapaıym eńbekkerler men adal azamattar qurady. Osyndaı adamdardy jan-jaqty nasıhattaý qajet. Zamanymyzdyń naǵyz batyrlary jáne ultymyzdyń senimdi tiregi – osyndaı adamdar. Memlekettiń qýaty – halyqta, al halyqtyń qýaty jasampaz kúsh-jigerde jáne otanshyldyqta.

Sondyqtan elimizdegi barlyq aýqymdy ózgerister adamǵa, onyń qarym-qabiletin tolyq ashýǵa baǵyttalǵan. Biz úshin reformalardyń ózi ǵana emes, túpki máni mańyzdy. Bizdiń reformalarymyz qyzyl sózge emes, naqty iske negizdelgen.

Basty maqsat – azamattarymyzdyń bolashaqqa degen senimin nyǵaıtyp, ál-aýqatyn arttyrý. Buqaralyq aqparat quraldarynyń qoǵamda Zań men tártipti ornyqtyrý úderisinde atqaratyn róli aıryqsha. Bul – elimizde júrgizilip jatqan jańǵyrýlarǵa negiz bolatyn qaǵıdattardyń biri», — dedi Prezıdent.