توقاەۆ بالا قۇقىقتارى جونىندەگى ۋاكىلدى قابىلدادى

مەملەكەت باسشىسى بالا قۇقىقتارى جونىندەگى ۋاكىل دينارا زاكيەۆانى قابىلدادى, دەپ حابارلايدى Qandastar.kz اقپاراتتىق پورتالى BAQ.kz سايتىن سىلتەمە جاساپ.

قاسىم-جومارت توقاەۆقا بالا قۇقىقتارىن قورعاۋ جانە جاس ۇرپاقتىڭ دەنساۋلىعىن ساقتاۋ مەن نىعايتۋ باعىتىندا اتقارىلعان جۇمىستار تۋرالى مالىمەت بەرىلدى.

سوڭعى ەكى جىلدا بالالاردىڭ قۇقىقتارىن قورعاۋ جانە قاۋىپسىزدىگىن قامتاماسىز ەتۋ, زورلىق-زومبىلىقتىڭ, ءسۋيتسيدتىڭ جانە جاسوسپىرىمدەر اراسىنداعى قىلمىستىڭ الدىن الۋ ماقساتىندا بىرقاتار شارا قابىلدانىپ, باعدارلامالار مەن زاڭدار ازىرلەندى. اتالعان جۇمىس اياسىندا بالا قۇقىقتارى جونىندەگى ۋاكىلدىڭ باستاماسىمەن زاڭناماعا 120 تۇزەتۋ ەنگىزىلدى.

دينارا زاكيەۆا بيىل 13 وڭىردەگى جانە 73 ەلدى مەكەندەگى احۋالعا مونيتورينگ جۇرگىزىلگەنىن, سونىڭ ىشىندە 272 مەكەمەدەگى بالالارعا جاسىرىن ساۋالداما جاسالعانىن, 173 وتباسىدا تاربيەلەنىپ جاتقان جەتكىنشەكتەردىڭ جاعدايىمەن تانىسقانىن ايتتى. تەكسەرىس قورىتىندىسى بويىنشا بالا قۇقىقتارىن قورعاۋعا قاتىستى قابىلدانعان زاڭ نورمالارىن بۇزعان 171 دەرەك انىقتالعان.

بۇدان بولەك, ايماقتارداعى 112 وتباسىلىق قولداۋ ورتالىعىنىڭ ءتيىمدى جۇمىس ىستەپ جاتقانى بەلگىلى بولدى. ولار تۇرمىستىق زورلىق-زومبىلىقتىڭ الدىن الۋ مەن بالالار قۇقىعىن قورعاۋ ماقساتىندا اشىلعان بولاتىن.

وبلىس اكىمدىكتەرى جانىنان بالا قۇقىقتارىن قورعاۋ جونىندەگى باسقارما قۇرۋ جۇمىستارى قولعا الىندى. سونداي-اق بالالاردى قورعاۋعا جاۋاپتى وڭىرلىك ورگانداردىڭ مىندەتتەرى مەن مارتەبەسىن ايقىندايتىن زاڭ جوباسى دايىندالىپ جاتىر.

بۇعان دەيىن مەملەكەت باسشىسى قابىلدانعان زاڭداردى ىسكە اسىرۋ جونىندە مىندەت جۇكتەگەن ەدى. بالا قۇقىقتارى جونىندەگى ۋاكىل پرەزيدەنت تاپسىرماسىنىڭ ورىندالۋ بارىسى تۋرالى باياندادى. اتاپ ايتقاندا, ەرەكشە قاجەتتىلىكتەرى بار بالالاردى دامىتۋ مەن وڭالتۋ ورتالىقتارىن قۇرۋ جۇمىستارىن جانداندىرۋعا توقتالدى. قازىرگى كەزدە «قازاقستان حالقىنا» قورى سەرىكتەستەرىمەن بىرگە 49 وڭالتۋ ورتالىعىن اشتى. بۇل مەكەمەلەردە ەرەكشە قاجەتتىلىكتەرى بار بالالارعا قىزمەت كورسەتىلەدى.

سونىمەن قاتار كەزدەسۋدە «قازاقستان بالالارى» باعدارلاماسىن ازىرلەۋ, ونلاين قاۋىپسىزدىكتى قامتاماسىز ەتۋ جانە كامەلەتكە تولماعان ازاماتتاردىڭ جەكە مالىمەتتەرىن قورعاۋ ماسەلەلەرى تالقىلاندى.

پرەزيدەنت بالا قۇقىقتارىن قورعاۋعا كەپىلدىك بەرۋ جۇيەسىن نىعايتىپ, جەتكىنشەكتەردى جان-جاقتى قولداۋ تەتىگىن قالىپتاستىرۋ ءۇشىن جەرگىلىكتى اتقارۋشى ورگاندار مەن وڭىرلىك ۋاكىلدەردىڭ كۇش-جىگەرىن جۇمىلدىرۋ ماڭىزدى ەكەنىنە نازار اۋداردى. بۇدان بولەك, مەكتەپتەردەگى ينكليۋزيۆتى ءبىلىم بەرۋ ءىسىن دامىتۋدى كوزدەيتىن قوسىمشا شارالار قابىلداۋدى تاپسىردى.