توقاەۆ كەز كەلگەن قاقتىعىستى شەشۋدىڭ جالعىز جولى بارىن ايتتى

تۇركى مەملەكەتتەرى ۇيىمىنىڭ بەيرەسمي سامميتىندە ەل پرەزيدەنتى قاسىم-جومارت توقاەۆ كەز كەلگەن قاقتىعىستار مەن قايشىلىقتاردى شەشۋدىڭ جالعىز جولى بار ەكەنىن ايتتى, دەپ حابارلايدى qandastar.kz. 

مەملەكەت باسشىسى جاھاندىق قاۋىپسىزدىك پەن تۇراقتىلىقتى قامتاماسىز ەتۋ ەلىمىزدىڭ سىرتقى ساياساتىنداعى نەگىزگى باسىمدىقتىڭ ءبىرى ەكەنىنە توقتالىپ, تۇركى حالىقتارىنىڭ ءاردايىم ىنتىماقتا بولۋى كەرەك ەكەنىن ايتتى.

ء«بىزدىڭ كۇش-قۋاتىمىز – بىرلىكتە. جالپى, كەز كەلگەن قاقتىعىس پەن قايشىلىقتى شەشۋدىڭ جالعىز جولى بار. ول – سىندارلى ديالوگ. وسى ورايدا توراعالىعىمىزدىڭ اياسىندا «مەدياتسياعا» ەرەكشە ءمان بەرىپ وتىرمىز. مەن ازەربايجان مەن ارمەنيا ەلدەرى اراسىنداعى بەيبىتشىلىك ورناتۋعا باعىتتالعان وڭ ءۇردىستى ەرەكشە اتاپ وتكىم كەلەدى. ءبىز تاتۋلىققا باستايتىن قادامداردى بارىنشا قۇپتايمىز. باكۋ مەن ەرەۆان اراسىندا بەيبىت كەلىسسوزدەر جۇرگىزۋ ءۇشىن ءوز الاڭىمىزدى ۇسىنۋعا ءاردايىم دايىنبىز», – دەدى قاسىم-جومارت توقاەۆ.