توقاەۆ: مۇنداي اۋرۋحانالار جالپىۇلتتىق ماڭىزعا يە

قاسىم-جومارت توقاەۆ شىعىس قازاقستان وبلىسىنا جۇمىس ساپارى بارىسىندا وسكەمەن قالاسىنداعى كوپبەيىندى ونكولوگيا جانە حيرۋرگيا ورتالىعىنىڭ بازاسىندا اشىلعان ساۋلەلىك تەراپيا جانە دياگنوستيكا ورتالىعىنا باردى. پرەزيدەنتكە جوعارى دالدىكپەن دياگنوستيكا جاساۋعا جانە ونكولوگيالىق اۋرۋلاردى ەمدەۋگە مۇمكىندىك بەرەتىن سوڭعى بۋىنداعى ماگنيتتى-رەزونانستى توموگرافيا (مرت), Elekta Versa HD جەلىلىك ۇدەتكىشى, Discovery RT كومپيۋتەرلىك توموگرافى سياقتى زاماناۋي مەديتسينالىق قۇرىلعىلاردىڭ جۇمىسى تانىستىرىلدى. سونداي-اق ورتالىق راديولوگيالىق سۋرەتتەردى ساقتاۋعا جانە ولاردى تەز تاۋىپ, ناقتى ۋاقىت رەجيمىندە زەرتتەۋگە ارنالعان PACS ارحيۆتەۋ جۇيەسىمەن جابدىقتالعان. كوپبەيىندى ونكولوگيا جانە حيرۋرگيا ورتالىعىنىڭ ديرەكتورى گۇلميرا ساعيدۋللينانىڭ ايتۋىنشا, جىل سايىن مۇندا 3 مىڭنان استام حيرۋگيالىق وپەراتسيا جاسالادى, ونىڭ 60 پايىزىندا از ءينۆازيۆتى ەمدەۋ تاسىلدەرى قولدانىلادى. ورتالىقتا مەديتسينا ماماندارىنىڭ شەتەلدەردە بىلىكتىلىگىن ارتتىرۋ جانە قايتا دايارلاۋ ىسىنە ايرىقشا ءمان بەرىلەدى. وتاندىق جانە شەتەلدىك ماماندار شاقىرىلىپ, تۇراقتى تۇردە شەبەرلىك ساعاتتارى ۇيىمداستىرىلىپ تۇرادى. بۇدان بولەك, قاسىم-جومارت توقاەۆقا شىعىس قازاقستان وبلىسىنداعى ونكولوگيالىق قىزمەتتىڭ قازىرگى جاي-كۇيى جونىندە باياندالدى. وڭىردە قاتەرلى ىسىكتەردى ەرتە انىقتاۋ كورسەتكىشتەرى ايتارلىقتاي ارتىپ, اۋرۋ دەڭگەيى ءۇشىنشى, ءتورتىنشى ساتىعا دەيىن اسقىنىپ كەتكەن سىرقاتتاردىڭ سانى قىسقارعان. سايكەسىنشە, ونكولوگيالىق اۋرۋدان قايتىس بولاتىن ازاماتتاردىڭ سانى ازايىپ كەلە جاتقانى بايقالادى. مەملەكەت باسشىسى ورتالىق دارىگەرلەرىمەن اڭگىمەلەسىپ, مەديتسينالىق ۇيىمنىڭ جۇمىسىنا تابىس تىلەدى. سونداي-اق ەلىمىزدە وسىنداي زاماناۋي مەديتسينالىق ورتالىقتار اشۋ ماڭىزدى ەكەنىن اتاپ ءوتتى. وتە جاقسى مەديتسينالىق مەكەمە ەكەن. زاماناۋي ءارى ساپالى قۇرالدارمەن جابدىقتالعان. ناۋقاستاردى ەمدەۋ كەرەك. قازىر مۇنداي اۋرۋحانالار جالپىۇلتتىق ماڭىزعا يە بولدى. وكىنىشكە قاراي, ونكولوگيا دەرتى جۇرەك-قان تامىرلارى اۋرۋلارىنان كەيىن ەكىنشى ورىندا تۇر, – دەدى قاسىم-جومارت توقاەۆ.