«Toqaevty qorqytý»: saıasatker Pýtın men Nazarbaevtyń kezdesýine qatysty pikir bildirdi (vıdeo)

Belgili qoǵam qaıratkeri, ekonomıst Ýálıhan Qaısarov Máskeýde ótken Reseı prezıdenti V.Pýtın men Qazaqstannyń burynǵy memleket basshysy N.Nazarbaevtyń kezdesýi týraly oıyn aıtty, dep habarlaıdy Qandastar.kz aqparat portaly.

Saıasatker «Qasqa Jol» youtube-arnasyna bergen subatynda atalǵan oqıǵanyń saıası astary bar degen. Iaǵnı, kezdesý Pýtınniń Qazaqstanǵa kórsetken saıası ısharasy bolýy múmkin.

«Meniń pikirimshe, Nazarbaevty Reseıge shaqyrǵan Pýtınniń ózi. Nazarbaev muny paıdalana otyryp jeke basqa qatysty máselerin kótergen bolar, ol jaǵy belgisiz. Al Pýtınniń Nazarbaevty shaqyrýdaǵy sebebi anyq. Qazir Toqaevtyń saıasaty Reseıden sál alshaqtaý, Qytaımen qarym-qatynasty sál jaqyndadyp jatyr. Túrkııa, Ortalyq Azııa elderimen qatynas artýda. Oǵan qosa Qazaqstan Reseıge qatysty ekinshi deńgeıli sankııalarǵa ilikpeý úshin halyqaralyq sankııalarǵa shetinen qosylmashy. Mysaly, qazir otandyq bankterdiń kóbi Reseıden qarjy qabyldamaıdy jáne keri jibermeıdi. Nátıjesinde,  Qazaqstandaǵy Reseıdiń yqpaly sál álsirep qaldy.

Sondyqtan Pýtınniń bul saıasaty – Toqaevty sál qorqytý, saıası belgi. Osy arqyly Pýtın Toqaevqa «eger bul saıasattan qaıtpaıtyn bolsań, Reseıge jaqyndamaıtyn bolsań, nazarbaevshyldardy qozǵaımyn» degen oıy. Demek, Pýtın men Nazarbaev kezdesýiniń eń basty maqsaty osy», – dedi Ýálıhan Qaısarov.

Sonymen qatar ol Pýtın qoldanýy yqtımal Nazarbaevtyń qandaı saıası jáne qarjylyq kúshi bar ekenin aıtqan.

«Nazarbaev qarapaıym adam emes, ol – memlekettik qupııalardy tasýshy adam. Tipti qaı memlekette qandaı tyńshylardyń baryn, aty-jónine deıin biledi. Qazaqstannyń ishki-syrtqy saıasatynda qandaı qupııalar habardar. Toqaev pen onyń aınalasyndaǵy, Úkimettegi adamdar týraly kompromat az emes.

Nazarbaevta júıeni aýystyrý úshin qarjy, BAQ bar. Jáne qazir 90 paıyzdaı joǵary laýazymdy azamattardy kezinde ózi qyzmetke qoıǵan. Osyny esepke alsaq, Nazarbaevtyń atqara alatyn qyzmeti áli az emes. Sondyqtan bul kezdesý – Pýtınnyń Toqaevqa judyryq kórsetýi. Iaǵnı, Toqaevqa qarsy qoıa alatyn adamnyń áli áldi jarııalanatyn qujattar jeterlik degen ıshara» – dedi ol.

Sóz sońynda saıasatker Nazarbaevtyń syrtqa shyǵýy Toqaevtyń abyroı-bedelin túsiredi degen oı aıtqan. Onyń sózinshe, eldegi zańnamaǵa sáıkes memlekettik qupııalardy biletin azamat memlekettik qyzmetten ketken kúnniń ózin de 5 jyl boıy shetelge shyǵýy úshin arnaıy ruqsat alýy shart.