“تولقۇجاتىڭدى الىپ, قۇل قىلىپ جۇمىسقا سالادى”. رەسەيگە جۇمىس ىزدەپ بارعان قازاقستاندىق سۇمدىق جايت تۋرالى ايتتى

فوتو: اشىق دەرەككوز

قازاقستاندىق جاس جىگىتتىڭ رەسەيگە جۇمىس ىستەۋگە بارىپ, قۇلدىققا ءتۇسىپ قالا جازداعان وقيعاسى ەل نازارىنا ىلىكتى, دەپ جازادى qandastar.kz Azattyq Rýhy سايتىنا سىلتەمە جاساپ.

info_aktobe ينستاگرام پاراقشاسىنىڭ مالىمدەۋىنشە, وقيعا الماتى قالاسى تۇرعىنىنىڭ باسىنان وتكەن.

«جاس جىگىت شەتەلدە جوعارى جالاقى تابامىن دەگەن ۇمىتپەن رەسەيگە اتتانعان. باستاپقىدا ءبارى جوسپار بويىنشا جۇرگەن: وعان جاقسى جۇمىس پەن لايىقتى ەڭبەكاقى ۋادە ەتىلگەن. بىراق كوپ ۇزاماي شىندىق باسقاشا بولىپ شىقتى. جۇمىس بەرۋشى ءوز مىندەتتەمەلەرىن ورىنداماي, ونى الداپ سوققان. جاس جىگىتتىڭ ەركىندىگى شەكتەلىپ, ول قيىن جاعدايدا قالعان», — دەپ جازىلعان حابارلامادا.

جاس جىگىت رەسەيدە پروكۋرورعا شاعىمدانىپ, ءوز قۇجاتتارىن قايتارىپ العانىمەن, جالاقىسىن الا الماعان. وسىدان كەيىن ول قاشۋعا شەشىم قابىلداپ, تراسسا بويىمەن جاياۋ ءجۇرىپ كەتەدى. ءساتى ءتۇسىپ, ونى اقتوبەگە بارا جاتقان اتىراۋلىق جاستار كەزدەستىرىپ, كومەك قولىن سوزعان.

«جاس جىگىتتى وزدەرىمەن بىرگە اقتوبەگە جەتكىزگەن جاستار وعان كومەكتەسۋ ءۇشىن قاراجات جيناۋدى ۇيىمداستىردى. ناتيجەسىندە, قاجەتتى سومانى جيناپ, ونى امان-ەسەن ۇيىنە جىبەردى», — دەپ جازىلعان ماتەريالدا.