“Tólqujatyńdy alyp, qul qylyp jumysqa salady”. Reseıge jumys izdep barǵan qazaqstandyq sumdyq jaıt týraly aıtty

Foto: ashyq derekkóz

Qazaqstandyq jas jigittiń Reseıge jumys isteýge baryp, quldyqqa túsip qala jazdaǵan oqıǵasy el nazaryna ilikti, dep jazady qandastar.kz Azattyq Rýhy saıtyna silteme jasap.

info_aktobe ınstagram paraqshasynyń málimdeýinshe, oqıǵa Almaty qalasy turǵynynyń basynan ótken.

«Jas jigit shetelde joǵary jalaqy tabamyn degen úmitpen Reseıge attanǵan. Bastapqyda bári jospar boıynsha júrgen: oǵan jaqsy jumys pen laıyqty eńbekaqy ýáde etilgen. Biraq kóp uzamaı shyndyq basqasha bolyp shyqty. Jumys berýshi óz mindettemelerin oryndamaı, ony aldap soqqan. Jas jigittiń erkindigi shektelip, ol qıyn jaǵdaıda qalǵan», — dep jazylǵan habarlamada.

Jas jigit Reseıde prokýrorǵa shaǵymdanyp, óz qujattaryn qaıtaryp alǵanymen, jalaqysyn ala almaǵan. Osydan keıin ol qashýǵa sheshim qabyldap, trassa boıymen jaıaý júrip ketedi. Sáti túsip, ony Aqtóbege bara jatqan atyraýlyq jastar kezdestirip, kómek qolyn sozǵan.

«Jas jigitti ózderimen birge Aqtóbege jetkizgen jastar oǵan kómektesý úshin qarajat jınaýdy uıymdastyrdy. Nátıjesinde, qajetti somany jınap, ony aman-esen úıine jiberdi», — dep jazylǵan materıalda.