«Tórt saǵatqa suranǵan»: Aqmola oblysynda jumyssyz qalǵan áıel sot sheshimimen qaıtadan jumysqa alyndy

Foto: istockphoto.com

Aqmola oblysynda zańsyz jumystan shyǵarylǵan kópbalaly ana sot sheshimimen qaıtadan jumysqa alyndy, dep habarlaıdy Azattyq Rýhy.

Aqmola oblystyq sotynyń azamattyq ister jónindegi sot alqasy «P.» JShS-ne jumystan bosatý týraly buıryqty zańsyz dep taný, jumysqa qaıta alý jáne jalaqyny tóleý týraly «A.»-nyń talap qoıýy boıynsha azamattyq is qarady.

Sotta anyqtalǵandaı, kópbalaly ana «A.» 2023 jyldyń qyrkúıeginen JShS-da dúkende aǵa kassır bolyp jumys istegen. 2024 jyldyń 4 naýryzynda «A.» dúkenniń dırektorynan suranyp jáne óz ornyna áriptesin jumysqa shyǵaryp, jumys ornynda saǵat 15.00-den 19.00-ge deıin bolmaǵan. Biraq dırektor «A.»-nyń jumysta bolmaǵany týraly akt jasap, túsindirme jazdyrtyp, ony jumystan shyǵarý týraly buıryq jazǵan.

«Sot«A.» basshynyń ruqsatymen, ony áriptesi aýystyryp, belgili sebeppen jumys ornynda bolmaǵanyn,  jumystan bosatýǵa negiz bolatyn tártiptik jaza oryn almaǵanyn, «A.» dırektordan suranǵanyn kýágerler men dúkendegi qyzmetkerlerdiń rastaǵanyn, tártiptik jaza qoldaný rásimi buzylǵanyn (buıryqta jumystan bosatýdyń negizi kórsetilmegen, tek Eńbek kodeksiniń 49-babynyń 3-tarmaqshasyna silteme jasalǵan) eskere otyryp «A.»-ny jumystan shyǵarý týraly buıryqty kelesi negizdermen zańsyz dep tanydy», – delingen sot habarlamasynda.

Sot sheshimimen «A.»-nyń talap qoıýy qanaǵattandyryldy, jumystan shyǵarý týraly buıryq jaramsyz dep tanylyp, «A.» buryńǵy jumys ornyna qaıta alyndy, JShS-dan «A.»-nyń paıdasyna 895 520 teńge bos júrýge májbúr bolǵany úshin jalaqy óndirildi.

Alqanyń qaýlysymen sot sheshimi ózgerissiz qaldyryldy.

Jumysqa qaıta ornyna alý jáne jalaqy tóleý týraly sheshim dereý oryndalýǵa jatady.

Sot sheshimi zańdy kúshine endi.