Bilim
«Turan. Qaıta berilgen múmkindik»
Mektep tabaldyryǵyn attaǵan ár túlektiń armany ata-anasynyń úmitin aqtap, on bir jyl boıyna sińirgen biliminiń deńgeıin ósirip joǵary oqý ornyna grantka túsý. On birinshi synypty qyzyqqa toly ótkizýdiń ornyna, zeıininiń bárin Ulttyq biryńǵaı testileýine daıyndyqpen kóz ilmeı ótkizgen túlek úshin memleket grantyn utyp alý úlken maqsat. Men de osy úsh jyl buryńǵy túlek sátime oralǵym kelip otyr.
Shyǵarmashylyq baǵytty tańdap, jýrnalıst mamandyǵyna grantqa túsip, ózimdi de, ata-anamdy da qýantý meniń sol jylǵy eń mańyzdy maqsatym bolǵan edi. Bir jylymdy osy emtıhanǵa daıyndyqpen ótkizdim, ózime senimdilikpen jáne bir az qobaljýmen kópten kútken UBT-ny tapsyrdym. Jaqsy upaı jınadym, grant konkýrsyna «túsemin» degen senimmen tirkeldim.
Konkýrsqa qatysýshylardyń báriniń jazy osy saıystyń jaýabyn bilýmen ótti. Kóp kúttirgen kún de kelip jetip, tamyz aıynda konkýrs nátıjeleri jarııalandy. Tizimde óz esimimdi tappadym. Men úshin bul óte kútpegen jaǵdaı boldy, dál men sekildi ball jınaǵan 3 túlek grant ıegeri atanypty, biraq maǵan bul baqyt buıyrmapty… Bul habardy bilgennen keıin, ózimnen bólek, ata-anamdy ýaıymdadym, uıaldym, qysyldym. Sol kúngi túnim uıqysyz ótti, ınstagram jelilerin aqtaryp otyryp qazirgi stýdenti bolyp otyrǵan oqý ornym Turannyń jazbasyn kórip qaldym. Rektorlyq grant berilip jatyr eken, jınaǵan ballyna qaraı bir, eki, úsh nemese tórt jyldyq grant alý múmkindigi bar eken. Jazbadaǵy kestege qarap ózimniń ballymnyń tórt jyldyq grant alýǵa múmkindigi jetetinin kórip, ishimde bir úmit paıda boldy. Qabyldaý komıssııasyna jazyp, qabyldaýǵa erteń kelýge bolatynyn aıtty. Qabyldaý komıssııasy demalyssyz jumys jasap jatyr eken, qýanyp ketip, anamdy ertip senbi kúni erte osy oqý ornyna keldim. Men sekildi jaqsy ball alyp, biraq memlekettik grantqa jete almaı qalǵan bolashaq áriptes stýdentter óte kóp eken. Ishimnen «barlyǵyna berilmeıtin shyǵar, bir shekteý sany bar-aý» degen ýaıymmen otyrdym. Alaıda, senesizder me? Qabyldaý komıssııasynyń kezeginde otyrǵan barlyq túlek óz ballyna saı grant ıegeri atandy. Sol esikten barlyǵy júzderindegi kúlkimen, qýanyshpen, jańa bir úmitpen shyǵyp jatty.
Sol sátten beri qazir Turan ýnıversıtetinde Rahman Alshanulynyń bizge bergen múmkindiginiń arqasynda jýrnalıstıka kafedrasynyń qazaq bóliminde 80 jýrnalıst bilim alyp jatyrmyz. Turan óshken úmitimizdi qaıta jaqqan oryn! Bolashaqqa úmitpen qaraǵan túlekterge jarqyn bolashaq qurýǵa múmkindik bere alǵan oryn!
Jýrnalıstıka jáne reporter isi kafedrasynyń
3-shi kýrs stýdenti Turdybekova Týmarıs
