Týrızm jáne sport mınıstrligi Shaıdorovtyń synyna jaýap berdi

Foto:mınıstrlik

Týrızm jáne sport mınıstrligi Bostondaǵy Álem chempıonatynda kúmis medel ıelenip, úzdik úshtiktiń qataryna engen konkımen mánerlep syrǵanaýshy Mıhaıl Shaıdorovtyń synyna jaýap berdi, dep habarlaıdy qandastar.kz Zakon.kz-ke silteme jasap.

Buǵan deıin Shaıdorov óz Otanynda jattyǵatyn oryn joq ekenin, soǵan baılanysty ózge elderden «muz aıdyn» izdeýge májbúr ekenin aıtqan. Mınıstrlik bul eskertýdi ádil dep sanaıdy.

«Elimizdiń jetekshi sportshylarynyń biri Mıhaıl Shaıdorovtyń sporttyq daıarlyǵyna qajetti tıisti jaǵdaılardyń joqtyǵynan biz habardarmyz. Bul fakt Qazaqstan Prezıdentiniń sport salasyndaǵy vertıkaldy basqarýdy qalpyna keltirý jónindegi tapsyrmasynyń negizdiligi men der ýaqytynda kóterilip otyrǵanyn taǵy da rastaıdy. Osy reformanyń negizgi baǵyttarynyń biri jergilikti atqarýshy organdardan joǵary jetistikterge daıyndalý úshin sport obektilerin týrızm mınıstrligine berý bolyp tabylady», – dep túsindirdi vedomstvodan.

Mınıstrlik elimizde ulttyq quramany Olımpıada oıyndaryna daıyndaý jospary bekitilgenin, onyń sheńberinde medaldarǵa áleýetti úmitker myqty sportshylar aıqyndalǵanyn habarlady. Olardyń árqaısysyna, sonyń ishinde Shaıdorovqa qatysty jaýapty qurylymdarǵa naqty mindetter bekitilgen.

«Bul baǵyttaǵy jumys jalǵasýda. Mınıstrlik turǵylyqty jerine nemese tirkeý ornyna qaramastan olımpıadalyq daıyndyq josparyna engizilgen árbir sportshyǵa qajetti qoldaýdy qamtamasyz etedi», — dep tolyqtyrady mınıstrlikten.

Buǵan deıin QR Týrızm jáne sport mınıstri Erbol Myrzabosynov elimizdiń qysqy sport túrlerindegi eń úzdik ókilderi Denıs Nıkıshamen (short-trek) jáne Mıhaıl Shaıdorovpen (mánerlep syrǵanaý) kezdeskenin habarlaǵanbyz. Taraptar Italııanyń Mılan qalasynda ótetin 2026 jylǵy olımpıadaǵa daıyndyq barysyn talqylady.