Túrkistan oblysynda gaz jarylyp, bir otbasynan úsh adam qaza tapty

Túrkistan oblysy, Qazyǵurt aýdany, Jigergen aýylyndaǵy úılerdiń birinde 7 qańtar kúni qaıǵyly oqıǵa boldy. Aıadaı úıde gaz jarylyp, bir otbasynyń úsh adamy baqılyq boldy. Bul týraly qandastar.kz aqparat portaly Stan.kz-ke cilteme jasap habarlaıdy.

Úsh kún qatarynan ákesi men eki ulynyń janazasyn shyǵarǵan qaraly otbasy sodan beri es jııa almaı júr.

40 jastaǵy Dáýlet Turabaev úsh ul, eki qyzdyń ákesi bolǵan. Balqashqa baryp-kelip jumys isteıtin jigit aǵasy 24-jeltoqsanda ǵana merekelik demalysqa kelgen. Sóıtip, qan qysymy kóterilip, densaýlyǵy syr bergen kelinshegin qalaǵa emdelýge jiberipti. Qos qyzymen Shymkentke ketken Dınara úıge tabıǵı gazdy eki-úsh aı buryn ǵana kirgizgenin aıtady. Onyń bul sózin uly men nemerelerinen aırylǵan analary da rastap otyr.

“Azanda qońyraý shalyp tur. “Dına qaıtshy. Gaz jaryldy. Men kúıip qaldym. Balalar aman” dedi. Keıin qaıta habarlasyp edim qaıynaǵam aldy. “Kelin olardy jedel-járdemmen aýrýhanaǵa áketip jatyr. Sol jaqqa bara ber” dedi. Jedel-járdemmen qatar bardyq Qazyǵurtqa. Eki balamdy kórdim. Ekeýi de túgeldeı kúıip qalǵan. Úlken balam “mama bizde bári jaqsy. Bolmashy jaraqat qoı. Jazylyp ketemiz” dedi”, – deıdi Dınara Áshirova.

Sózderinshe, jarylys aı buryn úıge ákelingen ıran peshindegi aqaýdan bolǵan.

“Gazdy kirgizgenine 3-4-aq aı boldy ǵoı. “Mama, tym bolmasa el qatarly eki bólmeni jylytyp otyraıyn” dep jazda kelgende ótinish jazyp bergenmin. О́zim Almatyda úlken uldyń qolynda turamyn. Sol kamen pesh qoıyp otyrǵan eken ǵoı. Kórgenderdiń aıtysy gaz atylǵanda búkil osy úıde qansha bólme bar sonyń barlyǵynyń áınegin syndyryp jibergen ǵoı. Myna jerde janyp jatqan dúnıeni, úıdi alyp qalamyz dep ottyń ishinde júre beripti balalarym. Sol aralyqta tútin ishki aǵzalaryn kúıdirip jibergen. Denesiniń 90 paıyzdan astamy kúıgen. Olardy aman alyp qalý múmkin bolmady”, – deıdi Dáýlettiń anasy.

Aýrýhanaǵa hal ústinde jetkizilgen tórt naýqastyń aldymen 5 jastaǵysy jan tapsyrypty. Keıin 13 jastaǵy ul, úshinshi kúni 40 jastaǵy er azamat ajal qushqan. Gaz jarylǵanda marqumdardyń úsheýi de bir bólmede jatypty. Tek ortanshy bala bólek bólmede uıyqtaǵan.

“Aman qalǵan balamnyń aıaǵy tereń kúıipti. Ol ákesi, aǵasy men inisi qaıtys bolǵanyn bilmeıdi. О́ıtkeni shoktan shyqpaǵan. Dárigerler kóńilin alańdatpaýdy tapsyrdy. Áli aýrýhanada jatyr. О́zim jarylys bolǵan úıde turyp jatyrmyz. Aýyl-aımaq bolyp 3 mıllıon teńge jınap, nesıemniń bireýin jaýyp berdi. Qalǵandary úıdi áktep-sylap, terezelerin qaptap berdi. Ázirge áınekteri joq”, – deıdi Dınara Áshirova.

Aılyqtan aılyqqa ómir súrgen otbasynyń moınynda 12 mıllıon teńge nesıe bar eken. Birin tórt túlik asyrap satý úshin alsa, qalǵanyna jolaýshy tasymaldaıtyn kólik satyp alǵan. Alaıda, ol kásiptiń biri de júrmeı otaǵasy Balqashta tas jol tóseıtin fırmada nápaqa tapqan. Onyń ózin nesıege bólip otyrǵan otbasy qara sý men nandy qanaǵat tutqandaryn aıtty.

Tótenshelikterdiń boljamy boıynsha, jarylys tabıǵı gazǵa jalǵanǵan peshtegi gaz-aýa qospasynan bolǵan.

“Aýdan ákimshiligi tarapynan jaqyn kúnderi zardap shekken azamattarǵa 1 mıllıon 585 teńge tóńireginde qarjy beriledi”, – deıdi aýdandyq ákimdik ókilderi.

40 jastaǵy áke men onyń 13 jáne 5 jastaǵy uldary qatarynan úsh kúnde jan tapsyrǵan. Olardy joqtap 35 jastaǵy jesiri men 12 jastaǵy ul, 9 jasar jáne 8 aılyq qyzdary qaldy.