تۇركىستاندا 4 جىل بۇرىن جوعالعان قىز اناسىمەن قاۋىشتى

فوتو: اشىق دەرەككوز

4 جىل بۇرىن ءىز-ءتۇزسىز جوعالىپ كەتكەن تۇركىستاندىق بويجەتكەن امان-ەسەن تابىلدى. پوليتسەيلەر ونى الماتىداعى تاماقتانۋ ورىندارىنىڭ بىرىندە جۇمىس ىستەپ جۇرگەن جەرىنەن تاپقان, – دەپ حابارلايدى qandastar.kz

بۇگىندە ونىڭ 4 جىل بويى قايدا جۇرگەنىن انىقتاۋ شارالارى جۇرگىزىلىپ جاتىر.

– 2021 جىلدىڭ جاز ايىندا جەرگىلىكتى تۇرعىن پوليتسياعا 16 جاستاعى قىزىنىڭ جوعالعانىن ايتىپ, ارىزدانعان. اقپارات الىسىمەن ءتارتىپ ساقشىلارى بارلىق قاجەتتى تەرگەۋ ارەكەتىن جاساعانىمەن, ناتيجە بولمادى. دەگەنمەن, بىرنەشە جىل وتسە دە تۇرعىننىڭ ارىزى نەگىزىندە ىزدەۋ ءىسى جالعاسىپ وتىردى. پوليتسەيلەر اتالعان جايت بويىنشا مۇقيات تەرگەۋ جۇرگىزىپ, وقيعانىڭ تولىق ءمان-جايىن انىقتايتىن بولادى, – دەلىنگەن تۇركىستان وبلىسى پوليتسيا دەپارتامەنتىنىڭ ءباسپاسوز قىزمەتى ۇسىنعان اقپاراتتا.

حابار-وشارسىز كەتكەن قىزىمەن 4 جىلدان سوڭ قايتا قاۋىشقان اناسى ءتارتىپ ساقشىلارىنا ريزاشىلىعىن ءبىلدىرىپ, العىس ايتتى.

– قىزىمنان حابارسىز قالىپ, نەندەي جاعدايدا ەكەنىن بىلە الماي جۇرگەن كۇندەر ارتتا قالدى. كوپ راقمەت سىزدەرگە. اراسىندا وزدەرىڭىزگە دە سەنىمسىزدىك بىلدىرگەن ەدىم, بۇگىن, مىنە ءۇمىتىم اقتالىپ وتىر, – دەدى ول.