تۇركىستاندا تۋريستىك ماۋسىم اشىلدى

تۇركىستاندا ساياحات ماۋسىمى سالتاناتتى تۇردە اشىلدى, «تۇركىستان – تۇركى الەمىنىڭ تۋريستىك استاناسى» اتتى مەرەكەلىك شارادا ءوڭىردىڭ تۋريستىك الەۋەتى كورسەتىلدى. قول كۇرەسى, گىر تاسىن كوتەرۋ, «Bauyrsak Fest», «قىمىز ءىشۋ» سياقتى ۇلتتىق ويىن-ساۋىق سايىستارى ءوتتى. وبلىستىڭ ونەر ۇجىمدارى مەن فولكلور انسامبلدەرى, بي توپتارى, تەاترلاندىرىلعان قويىلىمدار مەن الىپ باتىرلار كورەرمەنگە مەرەكەلىك كوڭىل كۇي سىيلادى.

قولونەرشىلەر جارمەڭكەسىنە قازاقى ناقىشتاعى بۇيىمدار قويىلدى. قازاق, وزبەك جانە قىرعىز كولىكتەرىنىڭ قاتىسۋىمەن ۇلى جىبەك جولى بويىنداعى قالالارعا اۆتوشەرۋ جولعا شىقتى. تۋريستىك استانا جىلى اياسىندا وڭىردە ءتۇرلى ءىس-شارا وتەدى دەپ جوسپارلانعان. ءابدۋالي ابدىعالي, حالىقارالىق DRIVE FORUM جوباسىنىڭ جەتەكشىسى: — ماقساتىمىز – اۆتوكولىكپەن تۋريستىك باعىتتى باستاۋ, دامىتۋ جانە تانىستىرۋ. جاڭادان كەلەتىن تۋريستەرگە جاڭا باعىتتاردى كورسەتۋ. ءبىزدىڭ باعىتىمىز 3 مەملەكەتتى قامتيدى. قازاقستاننان باستالادى, وزبەكستان جانە قىرعىزستانداعى ىستىقكولگە دەيىن بارامىز.

8 كۇن جۇرەمىز, سوندا 8 كۇندە 3 مىڭ شاقىرىمدى ءبولىپ تاستايمىز دا, 7 قالادا بولامىز. نۇرداۋلەت مەدەۋوۆ, وبلىستىق مادەنيەت جانە تۋريزم باسقارماسى باسشىسىنىڭ ورىنباسارى: — بىرقاتار اۋقىمدى ءىس-شارا جوسپارلانعان. حالىقارالىق اۋە شەرۋلارىنىڭ بايقاۋى, حالىقارالىق FIRE SHOW جارىستارى, «Voice of Turan» حالىقارالىق ءان بايقاۋىن وتكىزۋ جوسپارلانعان. جىل سوڭىنا دەيىن 100-گە جۋىق ءىس-شارا وتكىزىلەتىن بولادى. ونىڭ ىشىندە مادەنيەت, تۋريستىك, سپورتتىق باعىتتاعى شارالار بار. قىزمەت كورسەتۋ قىزمەتىنىڭ ساپاسىن ارتتىرۋ, ينفراقۇرىلىمدى جاقسارتۋ, تۋريزم سالاسىنا ينۆەستيتسيا تارتا وتىرىپ, قوناقۇيلەر مەن دەمالىس ورىندارىن سالۋدى جوسپارلاپ وتىرمىز.