تۇركياداعى قوناق ۇيدەن ءورت شىعىپ, قۇرباندار سانى 76-عا جەتتى

فوتو:yenisafak.com

تۇركيانىڭ سولتۇستىك-باتىسىنداعى كارتالكايا شاڭعى كۋرورتىنداعى قوناق ۇيدە ءورت شىققان. بۇگىن قۇرباندارىنىڭ سانى 76 ادامعا جەتتى. بۇل تۋرالى تۇركيانىڭ ىشكى ىستەر ءمينيسترى الي ەرلىكويا تاراقتان اقپاراتقا سىلتەمە جاساپ, qandastar.kz حابارلايدى.

ءورت جەرگىلىكتى ۋاقىت بويىنشا 03:27-دە Grand Kartal قوناق ءۇيىنىڭ 12 قاباتتى (باسقا دەرەكتەردە, 11 قاباتتى) عيماراتىندا باستالعان. قازىر تۇركيانىڭ مەكتەپتەرىندە ەكى اپتالىق قىسقى دەمالىس جالعاسىپ جاتقانى جانە شاڭعى ماۋسىمىنىڭ قىزعان كەزەڭىنە سايكەس قوناق ۇيدە 234 دەمالۋشى بولعان.

بولۋ گۋبەرناتورى ابدۋلازيز ايدىننىڭ ايتۋىنشا, ءورت قوناق ءۇيدىڭ ءتورتىنشى قاباتىنداعى مەيرامحانا ايماعىندا باستالىپ, جوعارى قاباتتارعا تارالعان. قوناق ءۇي بولۋ ورتالىعىنان ايتارلىقتاي قاشىقتا ورنالاسقانى جانە سۋىق اۋا رايى سالدارىنان ءورت سوندىرۋشىلەر وقيعا ورنىنا ءبىر ساعاتتاي كەشىگىپ جەتكەن.

قۇتقارۋ جۇمىستارى تاڭەرتەڭ دە جالعاسقان.

سول ۋاقىتتا قۇتقارۋشىلار قوناق ءۇيدىڭ كەيبىر بولىكتەرىنە ءالى دە كىرە الماعانى تۋرالى حابارلار تاراعان ەدى.

تۇرىك باق دەرەكتەرىنە سايكەس, كەم دەگەندە ەكى ادام قوناق ءۇيدىڭ تەرەزەلەرىنەن سەكىرىپ, قايتىس بولعان. كەيبىرەۋلەر توسەك-ورىننان ارقان جاساپ, تەرەزەلەردەن شىعۋعا تىرىسقان.

شاڭعى بويىنشا نۇسقاۋشى نەجمي كەپچەتۋتان تۇرىك تەلەۆيدەنيەسىنە بەرگەن سۇحباتىندا قوناق ءۇيدى جاقسى بىلگەندىكتەن ءوزىن قۇتقارا العانىن, بىراق عيماراتتىڭ قۇرىلىسىمەن تانىس بولماعان قوناقتاردىڭ مۇمكىندىكتەرى از بولعانىن ايتتى.

«ىشىندە قويۋ ءتۇتىن بولدى. ادامدار تەرەزەلەردەن ءبىزدى قۇتقارىڭىز دەپ ايقايلايتىن. ءبىز 20-25 ادامدى سىرتقا شىعارىپ الدىق», — دەدى ول NTV ارناسىنا بەرگەن سۇحباتىندا.

ءورتتىڭ سەبەبى ءالى انىقتالعان جوق. ادىلەت ءمينيسترى يىلماز تۋنچ تەرگەۋگە پروكۋراتۋرا وكىلدەرى تارتىلعانىن حابارلادى.

تۇركيا پرەزيدەنتى رەجەپ تايىپ ەردوعان قازا بولعانداردىڭ وتباسىلارىنا كوڭىل ايتىپ, 22 قاڭتاردى جالپىۇلتتىق ازا تۇتۋ كۇنى دەپ جاريالادى.

«قايعىلى وقيعاعا قاتىسى بارلار, سونىمەن قاتار ابايسىزدىق پەن قۇقىق بۇزۋشىلىقتارعا كىنالىلەر زاڭ الدىندا جاۋاپ بەرەدى», – دەدى رەجەپ تايىپ ەردوعان.

قازاقستان ءسىم-ءنىڭ رەسمي وكىلى ايبەك سمادياروۆ «ورتتەن زارداپ شەككەندەر اراسىندا قازاقستان ازاماتتارىن جوق ەكەنىن» مالىمدەدى. ءورتتىڭ نەدەن شىققانى بەلگىسىز – ۇكىمەت وقيعانى تەرگەۋ ءۇشىن التى پروكۋرور تاعايىنداعان.

سونداي-اق, مەملەكەت باسشىسى تۇركيا رەسپۋبليكاسىنىڭ پرەزيدەنتىنە كوڭىل ايتۋ جەدەلحاتىن جولدادى.

قاسىم-جومارت توقاەۆ جەدەلحاتتا بولۋ پروۆينتسياسىندا ورنالاسقان كارتالكايا تاۋ شاڭعىسى ورتالىعىندا بولعان ءورت سالدارىنان كوپتەگەن ادامنىڭ قازا تاپقانى تۋرالى سۋىت حاباردى تەرەڭ كۇيزەلىسپەن قابىلداعانىن جەتكىزدى.

“سونىمەن قاتار مەملەكەت باسشىسى قازاقستان حالقىنىڭ جانە ءوزىنىڭ اتىنان تۇركيا پرەزيدەنتى رەجەپ تايپ ەردوعان مەن جاقىندارىنان ايىرىلعان وتباسىلارعا, سونداي-اق باۋىرلاس تۇرىك حالقىنا كوڭىل ايتىپ, زارداپ شەككەندەردىڭ تەز ارادا ساۋىعىپ كەتۋىنە تىلەكتەستىك ءبىلدىردى”,- دەلىنگەن اقوردا تاراتقان اقپاراتتا.

ايتا كەتەيىك, وسى وقيعا بويىنشا تەرگەۋ باستالعالى توعىز ادام ۇستالعان, ولاردىڭ قاتارىندا قوناق ءۇي يەسى دە بار.