Túrkııadaǵy qonaq úıden órt shyǵyp, qurbandar sany 76-ǵa jetti

Foto:yenisafak.com

Túrkııanyń soltústik-batysyndaǵy Kartalkaıa shańǵy kýrortyndaǵy qonaq úıde órt shyqqan. Búgin qurbandarynyń sany 76 adamǵa jetti. Bul týraly Túrkııanyń Ishki ister mınıstri Alı Erlikoıa taraqtan aqparatqa silteme jasap, qandastar.kz habarlaıdy.

О́rt jergilikti ýaqyt boıynsha 03:27-de Grand Kartal qonaq úıiniń 12 qabatty (basqa derekterde, 11 qabatty) ǵımaratynda bastalǵan. Qazir Túrkııanyń mektepterinde eki aptalyq qysqy demalys jalǵasyp jatqany jáne shańǵy maýsymynyń qyzǵan kezeńine sáıkes qonaq úıde 234 demalýshy bolǵan.

Bolý gýbernatory Abdýlazız Aıdynnyń aıtýynsha, órt qonaq úıdiń tórtinshi qabatyndaǵy meıramhana aımaǵynda bastalyp, joǵary qabattarǵa taralǵan. Qonaq úı Bolý ortalyǵynan aıtarlyqtaı qashyqta ornalasqany jáne sýyq aýa raıy saldarynan órt sóndirýshiler oqıǵa ornyna bir saǵattaı keshigip jetken.

Qutqarý jumystary tańerteń de jalǵasqan.

Sol ýaqytta qutqarýshylar qonaq úıdiń keıbir bólikterine áli de kire almaǵany týraly habarlar taraǵan edi.

Túrik BAQ derekterine sáıkes, kem degende eki adam qonaq úıdiń terezelerinen sekirip, qaıtys bolǵan. Keıbireýler tósek-orynnan arqan jasap, terezelerden shyǵýǵa tyrysqan.

Shańǵy boıynsha nusqaýshy Nejmı Kepchetýtan túrik televıdenıesine bergen suhbatynda qonaq úıdi jaqsy bilgendikten ózin qutqara alǵanyn, biraq ǵımarattyń qurylysymen tanys bolmaǵan qonaqtardyń múmkindikteri az bolǵanyn aıtty.

«Ishinde qoıý tútin boldy. Adamdar terezelerden bizdi qutqaryńyz dep aıqaılaıtyn. Biz 20-25 adamdy syrtqa shyǵaryp aldyq», — dedi ol NTV arnasyna bergen suhbatynda.

О́rttiń sebebi áli anyqtalǵan joq. Ádilet mınıstri Iylmaz Týnch tergeýge prokýratýra ókilderi tartylǵanyn habarlady.

Túrkııa Prezıdenti Rejep Taıyp Erdoǵan qaza bolǵandardyń otbasylaryna kóńil aıtyp, 22 qańtardy Jalpyulttyq aza tutý kúni dep jarııalady.

«Qaıǵyly oqıǵaǵa qatysy barlar, sonymen qatar abaısyzdyq pen quqyq buzýshylyqtarǵa kináliler zań aldynda jaýap beredi», – dedi Rejep Taıyp Erdoǵan.

Qazaqstan SIM-niń resmı ókili Aıbek Smadııarov «órtten zardap shekkender arasynda Qazaqstan azamattaryn joq ekenin» málimdedi. О́rttiń neden shyqqany belgisiz – úkimet oqıǵany tergeý úshin alty prokýror taǵaıyndaǵan.

Sondaı-aq, Memleket basshysy Túrkııa Respýblıkasynyń Prezıdentine kóńil aıtý jedelhatyn joldady.

Qasym-Jomart Toqaev jedelhatta Bolý provınııasynda ornalasqan Kartalkaıa taý shańǵysy ortalyǵynda bolǵan órt saldarynan kóptegen adamnyń qaza tapqany týraly sýyt habardy tereń kúızelispen qabyldaǵanyn jetkizdi.

“Sonymen qatar Memleket basshysy Qazaqstan halqynyń jáne óziniń atynan Túrkııa Prezıdenti Rejep Taııp Erdoǵan men jaqyndarynan aıyrylǵan otbasylarǵa, sondaı-aq baýyrlas túrik halqyna kóńil aıtyp, zardap shekkenderdiń tez arada saýyǵyp ketýine tilektestik bildirdi”,- delingen Aqorda taratqan aqparatta.

Aıta keteıik, osy oqıǵa boıynsha tergeý bastalǵaly toǵyz adam ustalǵan, olardyń qatarynda qonaq úı ıesi de bar.