«تۇرمەگە ءتۇستىم»: كەزىندە حيت بولعان «اپپاق قار» ءانىنىڭ اۆتورى بازاردا قارا جۇمىس ىستەپ ءجۇر

فوتو: ۆيدەودان كادر: youtube.com/ KTK TV

كەزىندە حيت بولعان «اپپاق قار» ءانىنىڭ اۆتورى قارا جۇمىس ىستەپ ءجۇر, دەپ حابارلايدى qandastar.kz  Skifnews.kz اقپارات پورتالىنا سىلتەمە جاساپ. 

بۇل تۋرالى «مۇنارلان» توبى ورىنداعان تۋىندىنى جازعان ءبايدىلدا ابدىلداەۆتىڭ ءوزى «استارلى اقيقات» باعدارلاماسىندا ايتىپ بەردى.

ءبايدىلدا ابدىلداەۆ كەيىنگى 15 جىلدا قارا جۇمىستىڭ ءتۇر-ءتۇرىن ىستەگەن. «مۇنارلان» توبىنىڭ باعىن جاققان تۋىندىنىڭ اۆتورى كەيدە «التىن وردا» بازارىنىڭ ماڭىنداعى «پيتاكتا» تۇرىپ, ادال ەڭبەكپەن اقشا تابۋعا نامىستانبايدى.

«اپپاق قار» ءانىنىڭ اۆتورىمىن. ونەردە تيىن تابۋ كىشكەنە قيىنىراق. بالا-شاعا اسىراۋ كەرەك. جۇمىسقا الىپ كەتەدى. باعاسىنا كەلىسەسىڭ. ەكى ادام بولسا, 30 مىڭدى 15 مىڭنان ءبولىپ الاسىڭ. رەسەيدە ەكى ءانى حيت بولسا, ساراي سوقتىرىپ الادى ەكەن. گونورار كوپ تولەنەدى. ال بىزدە جاعداي وسى. ۇكىمەت ءان اۆتورلارىنا بيۋدجەتتەن جاردەماقى بولسە دەيمىن, بولماسا بۇرىنعىداي مادەنيەت ۇيىندە جاقسى اقشا تولەسە دەيسىڭ. سوندا ءبارى ونەردە جۇرەتىن ەدى. 2016-دا ۇكىمەت زاڭ شىعارىپ, 2018 جىلى تۇرمەگە ءتۇستىم. ءبىر جىل تۇرمەدە وتىرىپ, ەكى جىل باقىلاۋدا بولدىم. تۇرمەنى تۇزەۋ مەكەمەسى دەيدى عوي, مەنىڭشە, تۇرمە ادامدى بۇزادى. سول جاقتا دەنساۋلىق تا, مىنەز دە بۇزىلدى. بۇزىق دوستارىم دا كوبەيدى. ەندى شىعارماشىلىقتى قايتا قولعا الىپ جاتىرمىن», – دەدى حيت ءاننىڭ اۆتورى.