«Túrmege tústim»: Kezinde hıt bolǵan «Appaq qar» ániniń avtory bazarda qara jumys istep júr

Foto: Vıdeodan kadr: youtube.com/ KTK TV

Kezinde hıt bolǵan «Appaq qar» ániniń avtory qara jumys istep júr, dep habarlaıdy qandastar.kz  Skifnews.kz aqparat portalyna silteme jasap. 

Bul týraly «Munarlan» toby oryndaǵan týyndyny jazǵan Baıdildá Ábdildaevtiń ózi «Astarly aqıqat» baǵdarlamasynda aıtyp berdi.

Baıdildá Ábdildaev keıingi 15 jylda qara jumystyń túr-túrin istegen. «Munarlan» tobynyń baǵyn jaqqan týyndynyń avtory keıde «Altyn orda» bazarynyń mańyndaǵy «pıtakta» turyp, adal eńbekpen aqsha tabýǵa namystanbaıdy.

«Appaq qar» ániniń avtorymyn. О́nerde tıyn tabý kishkene qıynyraq. Bala-shaǵa asyraý kerek. Jumysqa alyp ketedi. Baǵasyna kelisesiń. Eki adam bolsa, 30 myńdy 15 myńnan bólip alasyń. Reseıde eki áni hıt bolsa, saraı soqtyryp alady eken. Gonorar kóp tólenedi. Al bizde jaǵdaı osy. Úkimet án avtorlaryna bıýdjetten járdemaqy bólse deımin, bolmasa burynǵydaı mádenıet úıinde jaqsy aqsha tólese deısiń. Sonda bári ónerde júretin edi. 2016-da úkimet zań shyǵaryp, 2018 jyly túrmege tústim. Bir jyl túrmede otyryp, eki jyl baqylaýda boldym. Túrmeni túzeý mekemesi deıdi ǵoı, menińshe, túrme adamdy buzady. Sol jaqta densaýlyq ta, minez de buzyldy. Buzyq dostarym da kóbeıdi. Endi shyǵarmashylyqty qaıta qolǵa alyp jatyrmyn», – dedi hıt ánniń avtory.