جاڭالىقتار
Twitter نەگىزىن قالاۋشى جاڭا وففلاين مەسسەندجەرىن تانىستىردى
Block باس ديرەكتورى جانە Twitter نەگىزىن قالاۋشى دجەك دورسي Bluetooth تورىمەن جۇمىس ىستەيتىن جاڭا ورتالىقتاندىرىلماعان حابار الماسۋ پلاتفورماسى Bitchat-تى اشتى, دەپ حابارلايدى Qandastar.kz.
دورسي X جەلىسىندەگى پاراقشاسىندا قولدانبانىڭ بەتا-نۇسقاسىندا جۇمىس ىستەۋ كەزىندە سوڭعى بىرنەشە كۇندە «Bluetooth تور جەلىلەرى, رەلەلەر (تۇيىندەر), ساقتاۋ جانە قايتا جىبەرۋ ۇلگىلەرى, شيفرلاۋ تۋرالى» ءبىلىم العانىن ايتتى.
قولدانبا Bluetooth تومەن ەنەرگياسىمەن (BLE) جۇمىس ىستەيدى. بۇل ينتەرنەت قوسىلىمىنسىز شيفرلانعان بايلانىستى قامتاماسىز ەتەدى. رەسمي قۇجاتقا سايكەس, پلاتفورما «ينتەرنەت-ينفراقۇرىلىمىنا تاۋەلدى بولمايدى. ول جەلىدەگى اقاۋلار مەن تسەنزۋراعا ءتوزىمدى, ۋاقىتشا, شيفرلانعان بايلانىستى قامتاماسىز ەتەدى».
Bitchat تولىعىمەن ورتالىقسىزداندىرىلعان. ول تىركەلگىلەردى, تەلەفون نومىرلەرىن نەمەسە ورتالىق سەرۆەرلەردى قاجەت ەتپەيدى. حابارلار قۇرىلعىلاردا ۋاقىتشا ساقتالادى جانە ولار شيفرلاۋ ارقىلى قورعالادى.
جۇيە قاجەت بولعان جاعدايدا حەشتەگتەر مەن قۇپيا سوزدەردى پايدالاناتىن چاتتاردى قولدايدى. ءاربىر قۇرىلعى جىبەرۋشى دە, رەلە رەتىندە دە ارەكەت ەتەدى. بۇل حابارلامالاردىڭ Bluetooth ارقىلى 30 مەترگە دەيىنگى راديۋستا ءبىر پايدالانۋشىدان ەكىنشىسىنە وتۋگە مۇمكىندىك بەرەدى.
ءدورسيدىڭ ايتۋىنشا, «Bitchat ادامدار جينالاتىن كەز كەلگەن جەردە, ينتەرنەتتىڭ قولجەتىمدىلىگىنە قاراماستان, سەنىمدى قوسىلىمدى قامتاماسىز ەتەدى». بۇل ونى قوسىلۋ مۇمكىندىگى شەكتەۋلى ايماقتاردا اسىرەسە پايدالى ەتەدى.
دورسي 2019 جىلى ورتالىقتاندىرىلماعان Bluesky الەۋمەتتىك جەلىسىن قۇردى. بىراق 2024 جىلدىڭ مامىرىندا ديرەكتورلار كەڭەسىنەن كەتتى.
