ۇبت قاشان وتەدى?

فوتو:Qazaqstan.tv

نەگىزگى ۇبت-عا ءوتىنىش قابىلداۋ 12 ساۋىردە باستالادى, دەپ حابارلايدى qandastar.kz

عىلىم جانە جوعارى ءبىلىم مينيسترلىگىنىڭ حابارلاۋىنشا, 2025 جىلعى نەگىزگى ۇبت-عا وتىنىشتەر 12-25 ءساۋىر ارالىعىندا قابىلدانادى. 12-18 ءساۋىر ارالىعىندا ءبىر رەت, ال 19-25 ءساۋىر ارالىعىندا ءبىر نەمەسە ەكى رەت تاپسىرۋعا ءوتىنىش بەرۋگە بولادى.

تەستىلەۋدىڭ ءوزى 16 مامىردا باستالىپ, 5 شىلدەگە دەيىن جالعاسادى. تالاپكەرلەر ۇبت-نى ەكى رەت تاپسىرىپ, ەڭ جوعارى جيناعان ۇپايىمەن گرانت كونكۋرسىنا قاتىسا الادى.

ءوتىنىش بەرۋ ءۇشىن app.testcenter.kz سايتىنا نەمەسە UTO.kz قوسىمشاسىنا كىرىپ, تەست تاپسىراتىن كۇندى, ۋاقىتتى جانە ورىندى تاڭداۋعا بولادى. ەكى مۇمكىندىكتە دە بىردەي بەيىندىك پاندەر كومبيناتسياسى تاڭدالادى.

تالاپكەرلەرگە دايىندالۋعا كومەكتەسۋ ءۇشىن ءار ءپان بويىنشا تاقىرىپتىق تالداۋ جاسالادى. قاڭتار جانە ناۋرىز ايلارىندا تەست تاپسىرعاندار ءوز ناتيجەلەرىنە قاراي قاي تاقىرىپتاردى قايتالاۋ كەرەكتىگىن كورە الادى. سونىمەن قاتار ونلاين بايقاۋ تەستتەرى دە بار.

ۇبت فورماتى وزگەرگەن جوق:

• 3 مىندەتتى ءپان, 2 بەيىندىك ءپان;

• بارلىعى 120 تاپسىرما;

• ەڭ جوعارى بالل – 140;

• تەستىلەۋ ۋاقىتى – 4 ساعات (ەرەكشە قاجەتتىلىكتەرى بار وقۋشىلارعا قوسىمشا 40 مينۋت بەرىلەدى).

تەست كەزىندە كالكۋلياتور, حيميالىق ەلەمەنتتەردىڭ كەستەسى جانە تۇزداردىڭ ەرىگىشتىك كەستەسى قولجەتىمدى. قاعاز نۇسقالارى دا بەرىلەدى. ۇبت-دان كەيىن 30 مينۋت ىشىندە اپەللياتسيا بەرۋگە بولادى. سەرتيفيكات اپەللياتسيادان كەيىن جەكە كابينەتتە كورسەتىلەدى.

شەكتى باللدار:

• قۇقىق جانە پەداگوگيكا – كەمىندە 75 بالل;

• مەديتسينا – كەمىندە 70 بالل;

• ۇلتتىق جوو – كەمىندە 65 بالل;

• باسقا جوو – كەمىندە 50 بالل. تەستىلەۋ قاۋىپسىزدىگىن ساقتاۋ ءۇشىن تەلەفون, شپارگالكا سياقتى تىيىم سالىنعان زاتتاردى الىپ كىرۋگە بولمايدى. اۋديتوريالاردا بەينەباقىلاۋ جۇرگىزىلەدى, ال تەست اياقتالعاننان كەيىن بەينەجازبالار قارالىپ, ەرەجە بۇزۋشىلىق انىقتالسا, ناتيجەلەر جويىلادى.