جاڭالىقتار
ءۇيى سۋدىڭ استىندا قالعان 130 وتباسىنا جاڭا باسپانا بەرىلدى
سۋ تاسقىنىنان كەيىن 20 مىڭنان استام قازاقستاندىق وتباسى مەملەكەتتىك قولداۋعا يە بولعان. بۇل جايىندا ۇكىمەتتىڭ ءباسپاسوز قىزمەتىنەن حابارلاندى.
قر ۇكىمەتى مەملەكەت باسشىسى قاسىم-جومارت توقاەۆتىڭ تاپسىرماسى بويىنشا بيىلعى كوكتەمدە سۋ تاسقىنىنان زارداپ شەككەن ازاماتتارعا كەلتىرىلگەن زالالدى وتەۋ جۇمىسىن جالعاستىرىپ جاتىر.
بۇگىنگى تاڭدا 20 601 وتباسى 7,4 ملرد تەڭگەدەن استام سوماعا 100 اەك (369 200 تەڭگە) مولشەرىندە بىرجولعى تولەم الدى.
مال شىعىنى ءۇشىن بەرىلگەن مەملەكەتتىك كومەك كولەمى 1,1 ملرد تەڭگەدەن استى..
11 مامىرداعى جاعداي بويىنشا 130 وتباسى ەسكى تۇرعىن ۇيلەرىنىڭ ورنىنا جاڭا باسپاناعا يە بولدى. بۇل رەتتە اقتوبە, قوستاناي, سولتۇستىك قازاقستان جانە پاۆلودار وبلىستارىندا زارداپ شەككەن ازاماتتارعا بەرىلەتىن 239 جاڭا ءۇي سالىنىپ جاتىر. سونىمەن قاتار 568 وتباسى 710 ملن تەڭگەدەن استام سوماعا تۇرعىن ءۇيدى جوندەۋگە جانە قالپىنا كەلتىرۋگە وتەماقى الدى. جالپى العاندا زارداپ شەككەن وڭىرلەردە 9995 تۇرعىن ءۇي تەكسەرىلىپ, 7522 نىساندا باعالاۋ جۇمىستارى جۇرگىزىلدى.
زالالدى وتەۋ جۇمىستارى جالعاسۋدا جانە ۇكىمەتتىڭ قاتاڭ باقىلاۋىنا الىنعان. قر پرەزيدەنتىنىڭ تاپسىرماسى بويىنشا بارلىق زارداپ شەككەن ازاماتتارعا جان-جاقتى كومەك پەن قولداۋ كورسەتىلەدى.
