ۇكىمەت «AMANAT»-تىڭ باستاماسىمەن شارۋالارعا ارنالعان ديزەل وتىنىن ارزانداتتى

پارتيانىڭ ارالاسقاننان كەيىن شارۋالار ءۇشىن جەڭىلدەتىلگەن ديزەل وتىنىنىڭ 1 ءليترى 250 تەڭگەگە دەيىن تومەندەدى.

كوبىنە-كوپ, ءوڭىر كاسىپكەرلەرى ءۇشىن ءوز ماسەلەسىن ورتالىق مەملەكەتتىك ورگاندارعا جەتكىزۋ قيىنعا سوعادى. بۇل رەتتە, «AMANAT» الاڭىندا پارتيا حاتشىسى ەلدار جۇماعازيەۆتىڭ توراعالىعىمەن «AMANAT» فيليالدارى جانىنداعى ەكونوميكانى, كاسىپكەرلىكتى جانە اگرارلىق سەكتوردى دامىتۋ جونىندەگى وڭىرلىك كەڭەستەردىڭ كەڭەيتىلگەن وتىرىستارى وتكىزىلۋدە. وسىلايشا, بيىل 11 تامىزدا اباي, جەتىسۋ جانە شىعىس قازاقستان وبلىستارىنىڭ كاسىپكەرلەرى ءوز ماسەلەسىن قۇزىرلى ورگاندارعا جەتكىزدى.

ماسەلەن, اباي وبلىسىنىڭ شارۋالارى ديزەل وتىنىنىڭ قىمباتشىلىعىنا شاعىمدانۋدا. بۇل تۋرالى كاسىپكەر, «جان-ەر» جشس ديرەكتورى سەزبەك احمەتوۆ ايتتى.

«جەڭىلدەتىلگەن باعاداعى 1 ليتر جانار مايدىڭ قۇنى 270 تەڭگەگە جەتتى. جانار ماي قۇنى اۋىل شارۋاشىلىعى ونىمدەرىنىڭ جانە وزگە دە تاۋلاردىڭ, قىزمەتتەردىڭ باعاسىنا ايتارلىقتاي اسەر ەتەدى. اۋىل شارۋاشىلىعى تاۋارىن وندىرۋشىلەر ءۇشىن ديزەل وتىنىنىڭ باعاسىن ارزانداتۋ قاجەت», – دەدى ول.

ايتا كەتەيىك, بۇعان دەيىن پارتيالىقتار باتىس جانە سولتۇستىك وڭىرلەردىڭ كاسىپكەرلەرىمەن كەڭەس وتكىزگەن كەزدە دە شارۋالار وسى وزەكتى ماسەلەنى كوتەرگەن ەدى. ەنەرگەتيكا ۆيتسە-ءمينيسترى ەرلان اقكەنجەنوۆ ۆەدومستۆو جەڭىلدەتىلگەن باعاداعى ديزەل وتىنىن وڭىرلەرگە جەتكىزۋدى ەسكەرە وتىرىپ, ونىڭ 1 ءليترىن 238 تەڭگەگە دەيىن ارزانداتۋ تۋرالى شەشىم قابىلداعانىن ايتتى.

«ماسەلە مۇناي وڭدەۋ زاۋىتتارىنان جانار-جاعار ماي الىپ, اۋىل شارۋاشىلىعى ونىمدەرىن وندىرۋشىلەرگە ديزەل وتىنىن جەتكىزۋ, ساقتاۋ قىزمەتىن كورسەتەتىن وڭىرلەردەگى دەلدالداردىڭ الەۋمەتتىك جاۋاپكەرشىلىگى تۋرالى بولىپ وتىر. ەنەرگەتيكا مينيسترلىگى ۇسىنعان وڭىرلىك جانار-جاعار ماي وپەراتورلارىنىڭ 1 ليترىنە 12 تەڭگە دەڭگەيىندەگى مارجاسىن ەسكەرە وتىرىپ, جەڭىلدەتىلگەن باعاداعى ديزەلدىڭ 1 ءليترى 250 تەڭدەگەن اسپاۋى ءتيىس», – دەدى ول.

پارتيا حاتشىسى ەلدار جۇماعازيەۆ وڭىرلەردەگى كاسىپكەرلەرگە وزدەرىن تولعاندىرعان سۇراقتارىن مينيسترلىكتەر وكىلدەرىنە تىكەلەي جولداپ, جاۋاپ الۋعا جاقسى مۇمكىندىك بەرىلگەنىن اتاپ ءوتتى.

«مۇنداي كەزدەسۋلەر مەملەكەتتىك ورگاندارعا بيزنەس-قوعامداستىقتىڭ ناقتى قاجەتتىلىگى تۋرالى تولىق اقپارات الۋعا جانە ناقتى جاعدايدى ەسكەرە وتىرىپ, ءوز ساياساتىن بەيىمدەۋگە مۇمكىندىك بەرەدى. بيلىك پەن بيزنەستىڭ ديالوگى ءتۇيىندى ماسەلەلەردى انىقتاۋعا, بيۋروكراتيالىق كەدەرگىلەردى جويۋعا كومەكتەسەدى. سونداي-اق, ءتۇرلى ماسەلەنىڭ شەشىمىن تابۋدىڭ اشىقتىعى مەن تيىمدىلىگىنە ىقپال ەتەدى. «AMANAT» پارتياسىنىڭ الاڭى – تۇراقتى ەكونوميكالىق دامۋعا اتسالىسۋدىڭ جانە كاسىپكەرلەر ءۇشىن قولايلى جاعداي جاساۋدىڭ ءتيىمدى قۇرالى. ماجىلىستەگى جانە بارلىق دەڭگەيدەگى ماسليحاتتارداعى پارتيا دەپۋتاتتارى كوتەرىلگەن ماسەلەلەردى نازارعا الىپ, وسى باعىتتا جۇيەلى جۇمىس جۇرگىزەدى», – دەدى پارتيا حاتشىسى