Úkimet «AMANAT»-tyń bastamasymen sharýalarǵa arnalǵan dızel otynyn arzandatty

Partııanyń aralasqannan keıin sharýalar úshin jeńildetilgen dızel otynynyń 1 lıtri 250 teńgege deıin tómendedi.

Kóbine-kóp, óńir kásipkerleri úshin óz máselesin ortalyq memlekettik organdarǵa jetkizý qıynǵa soǵady. Bul rette, «AMANAT» alańynda partııa Hatshysy Eldar Jumaǵazıevtiń tóraǵalyǵymen «AMANAT» fılıaldary janyndaǵy Ekonomıkany, kásipkerlikti jáne agrarlyq sektordy damytý jónindegi óńirlik keńesterdiń keńeıtilgen otyrystary ótkizilýde. Osylaısha, bıyl 11 tamyzda Abaı, Jetisý jáne Shyǵys Qazaqstan oblystarynyń kásipkerleri óz máselesin quzyrly organdarǵa jetkizdi.

Máselen, Abaı oblysynyń sharýalary dızel otynynyń qymbatshylyǵyna shaǵymdanýda. Bul týraly kásipker, «Jan-Er» JShS dırektory Sezbek Ahmetov aıtty.

«Jeńildetilgen baǵadaǵy 1 lıtr janar maıdyń quny 270 teńgege jetti. Janar maı quny aýyl sharýashylyǵy ónimderiniń jáne ózge de taýlardyń, qyzmetterdiń baǵasyna aıtarlyqtaı áser etedi. Aýyl sharýashylyǵy taýaryn óndirýshiler úshin dızel otynynyń baǵasyn arzandatý qajet», – dedi ol.

Aıta keteıik, buǵan deıin partııalyqtar batys jáne soltústik óńirlerdiń kásipkerlerimen keńes ótkizgen kezde de sharýalar osy ózekti máseleni kótergen edi. Energetıka vıe-mınıstri Erlan Aqkenjenov vedomstvo jeńildetilgen baǵadaǵy dızel otynyn óńirlerge jetkizýdi eskere otyryp, onyń 1 lıtrin 238 teńgege deıin arzandatý týraly sheshim qabyldaǵanyn aıtty.

«Másele munaı óńdeý zaýyttarynan janar-jaǵar maı alyp, aýyl sharýashylyǵy ónimderin óndirýshilerge dızel otynyn jetkizý, saqtaý qyzmetin kórsetetin óńirlerdegi deldaldardyń áleýmettik jaýapkershiligi týraly bolyp otyr. Energetıka mınıstrligi usynǵan óńirlik janar-jaǵar maı operatorlarynyń 1 lıtrine 12 teńge deńgeıindegi marjasyn eskere otyryp, jeńildetilgen baǵadaǵy dızeldiń 1 lıtri 250 teńdegen aspaýy tıis», – dedi ol.

Partııa Hatshysy Eldar Jumaǵazıev óńirlerdegi kásipkerlerge ózderin tolǵandyrǵan suraqtaryn mınıstrlikter ókilderine tikeleı joldap, jaýap alýǵa jaqsy múmkindik berilgenin atap ótti.

«Mundaı kezdesýler memlekettik organdarǵa bıznes-qoǵamdastyqtyń naqty qajettiligi týraly tolyq aqparat alýǵa jáne naqty jaǵdaıdy eskere otyryp, óz saıasatyn beıimdeýge múmkindik beredi. Bılik pen bıznestiń dıalogy túıindi máselelerdi anyqtaýǵa, bıýrokratııalyq kedergilerdi joıýǵa kómektesedi. Sondaı-aq, túrli máseleniń sheshimin tabýdyń ashyqtyǵy men tıimdiligine yqpal etedi. «AMANAT» partııasynyń alańy – turaqty ekonomıkalyq damýǵa atsalysýdyń jáne kásipkerler úshin qolaıly jaǵdaı jasaýdyń tıimdi quraly. Májilistegi jáne barlyq deńgeıdegi máslıhattardaǵy partııa depýtattary kóterilgen máselelerdi nazarǵa alyp, osy baǵytta júıeli jumys júrgizedi», – dedi partııa Hatshysy