Úkimet qun salyǵynyń úsh túrin usynyp otyr

Qazaqstan Úkimeti qosymsha qun salyǵynyń saralanǵan mólsherlemesin usynyp otyr. Aýyl sharýashylyǵy ónimin óndirýshiler bul salyqtan múlde bosatylady. Bul týraly búgin vıe-premer – ulttyq ekonomıka mınıstri Serik Jumanǵarın málimdedi, dep habarlaıdy qandastar.kz 

Onyń aıtýynsha, QQS – bıýdjetti tolyqtyrýdyń negizgi kózderiniń biri. Memlekettik bıýdjettiń 25 paıyzyn quraıdy.

«16% bazalyq mólsherleme usynylady. QQS mólsherlemesin arttyrý jáne saralaý bıýdjettiń qubylmaly munaı kiristerine táýeldiligin azaıtýǵa, Ulttyq qordyń jınaq fýnkııasyn kúsheıtýge jáne basym memlekettik jobalardy qarjylandyrýǵa múmkindik beredi. Bul rette biz aýyl sharýashylyǵy ónimderin óndirýshilerdi úshin qosymsha qun salyǵynan bosatýdy usynamyz. Qazir sharýa qojalyqtary QQS tólemeıdi. Biz osyny saqtap qalamyz», — dedi Jumanǵarın Úkimet otyrysynda.

Qazir aýyl sharýashylyǵy taýaryn óndirýshi zańdy tulǵalar bıýdjetke tólenýge tıis QQS-tiń 30% tóleıdi. Jumanǵarın olar endi bul tólemnen bosatylatynyn atap ótti.

«Osylaısha, Qazaqstanda óndirilgen barlyq ónim (kartop, qyzanaq, pııaz, qyryqqabat jáne t.b.) básekege neǵurlym qabiletti bolady», — dedi ol.

Úkimet usynyp otyrǵan ekinshi stavka – 10% mólsherleme.

«Biz densaýlyq saqtaý salasy úshin tómendetilgen mólsherlemeni usynamyz. Bul stavkany taǵy  kimder qoldanady? Bul másele qosymsha talqylaýdy qajet etedi. Biz barlyq qyzmet túri boıynsha usynystardy jınaımyz, eseptep sanaımyz jáne sizdermen birge sheshemiz», — dedi vıe-premer.

Osy oraıda Jumanǵarın nelikten 10% usynylyp otyrǵanyn túsindirdi.

«Bul ákimshilendirýdiń kúrdeliligine baılanysty. Eń aldymen bıznes úshin. Mólsherlemeler kóp bolǵan kezde býhgalterlik esep kúrdelene túsedi, deklaraııa jasaý qıynǵa soǵady. Buǵan jol bermeý úshin biz 16%, 10%, 0% jáne salyqtan bosatýdy usynamyz», — dedi ol.

Premer-mınıstr Oljas Bektenov Úkimet usynyp otyrǵan mólsherlemelerdi óńirlerde halyqpen talqylaýdy tapsyrdy.

«Jalpy usynystardy qoldaımyz. Osy aptada óńirlerge baryp, halyqtyń barlyq sanatymen egjeı-tegjeıli talqylaý kerek. Men de Astanada jáne óńirlerge baryp, talqylaýlar ótkizemin. Osy jumystyń nátıjesi boıynsha Salyq kodeksiniń jobasy men ilespe zań jobasyna túzetýlerdi 20 aqpanǵa deıin Májiliske engizý kerek. Ary qaraı Májiliste talqylaýdy jalǵastyramyz», — dedi Bektenov.