جاڭالىقتار
ۇكىمەت ۋاقىت بەلدەۋىنە قاتىستى زەرتتەۋدى جاريالادى
فوتو:Aikyn گازەتى
ۇكىمەت وتىرىسىندا ۋاقىت بەلدەۋى ماسەلەسىنە نازار اۋدارىلدى. ساۋدا جانە ينتەگراتسيا ءمينيسترى ارمان شاققاليەۆ بىرىڭعاي ۋاقىت بەلدەۋىنە كوشۋدىڭ حالىق دەنساۋلىعىنا اسەرىنە قاتىستى جۇرگىزىلگەن مونيتورينگ ناتيجەلەرى تۋرالى باياندادى, دەپ جازدى qandastar.kz
ول ءماجىلىستىڭ AMANAT فراكتسياسىنداعى تالقىلاۋ قورىتىندىسى بويىنشا ساراپشىلار قوعامداستىقتى, مەديتسينا, نەيروعىلىم, بيوفيزيكا, گەنەتيكا, استروفيزيكا, فيزيولوگيا سالاسىنداعى عىلىمي-زەرتتەۋ ينستيتۋتتارىن, بارلىق دەڭگەيدەگى ءماسليحات دەپۋتاتتارى مەن مۇددەلى تۇلعالاردى تارتا وتىرىپ, بىرىڭعاي ۋاقىت بەلدەۋىنە كوشۋدىڭ حالىقتىڭ دەنساۋلىعىنا, ەنەرگيا تۇتىنۋىنا جانە ەڭبەك ونىمدىلىگىنە اسەرىنە مونيتورينگ جۇرگىزىلگەنىن اتاپ ءوتتى.
جۇمىس بارىسىندا دەرەكتەردى زەرتتەۋ, ساۋالناما ناتيجەلەرى جانە بىرىڭعاي ۋاقىت بەلدەۋىنە اۋىسقانعا دەيىنگى جانە كەيىنگى كورسەتكىشتەردى سالىستىرۋدى قامتيتىن كەشەندى ءتاسىل قولدانىلدى. زەرتتەۋ جۇرگىزۋ ادىستەمەسى بىرىڭعاي ۋاقىت بەلدەۋىن ەنگىزۋدىڭ حالىق دەنساۋلىعىنا, ەنەرگيا تۇتىنۋعا, ەڭبەك تيىمدىلىگىنە, وقۋشىلاردىڭ ۇلگەرىمىنە, جول-كولىك وقيعالارى دەڭگەيىنە, قىلمىسقا جانە باسقا دا اسپەكتىلەرگە اسەرىن باعالاۋ بويىنشا 40-تان استام مەتريكا مەن كورسەتكىشتەردى قامتيدى.
«دەنساۋلىق ساقتاۋ سالاسى بويىنشا 100 مىڭ ادامعا ەسەپتەلگەن قالا جانە اۋىل تۇرعىندارىمەن قاتار ءتۇرلى جاستاعى ازاماتتار قامتىلدى. ەنەرگيا تۇتىنۋ بويىنشا ەلەكتر ەنەرگياسىن تۇتىنۋ ستاتيستيكاسىن, ونىڭ ىشىندە ەڭ جوعارى جۇكتەمەلەردى جانە بۇكىل ەل بويىنشا ەلەكتر ەنەرگياسىن تۇتىنۋعا سالىستىرۋ جۇرگىزىلدى. ەڭبەك قىزمەتى بويىنشا ورىندالعان جۇمىس كولەمى, كەشىگۋ جانە ساباققا كەلمەۋ جاعدايلارى, جاراقاتتار مەن ءتارتىپ بۇزۋ جاعدايلارى قامتىلعان. ناتيجەلەر بىرىڭعاي ۋاقىت بەلدەۋىنە كوشۋدىڭ حالىقتىڭ تىنىس-تىرشىلىگىنىڭ نەگىزگى كورسەتكىشتەرىنە تەرىس اسەرى جوق ەكەنىن كورسەتەدى», — دەپ ءتۇسىندىردى ارمان شاققاليەۆ.
«مەملەكەت باسشىسى ۇكىمەت پەن پارلامەنتكە اتالعان ماسەلەنى ەگجەي-تەگجەيلى قاراپ, بىرلەسىپ وڭتايلى شەشىم قابىلداۋدى تاپسىرعانىن بىلەسىزدەر. ءمينيستردىڭ بايانداماسىندا ايتىلعانداي, مونيتورينگ بىرىڭعاي ۋاقىت بەلدەۋىن ەنگىزۋ تۋرالى قابىلدانعان شەشىمنىڭ تەرىس اسەرى جوق ەكەنىن كورسەتتى»,— دەپ اتاپ وتكەن ولجاس بەكتەنوۆ پارلامەنت ماجىلىسىمەن بىرلەسىپ, ءتيىستى جۇمىستى ۇيىمداستىرۋدى تاپسىردى.
