ۋكرايناداعى سوعىستا قازاقستاندىق ازامات قايتىس بولدى

فوتو: اشىق دەرەككوز

ۋكراينادا قازاقستاندىق ازامات قايتىس بولدى, – دەپ حابارلايدى qandastar.kz Dalanews.kz سايتىنا سىلتەپ. 

بۇل تۋرالى جۋرناليست, بلوگەر لۇقپان احمەدياروۆ حابارلادى. ايبەك رامازانوۆ ورال قالاسىنىڭ تۋماسى.

«ول 2023 جىلى ءوز ەركىمەن رەسەي قارۋلى كۇشتەرىنىڭ قاتارىنا  قوسىلىپ ۋكرايناعا قارسى قىلمىستىق سوعىسقا قاتىستى. بۇعان دەيىن ايبەك رامازانوۆ باتىس قازاقستان وبلىسىندا جايىق مۇناي كومپانياسىندا جۇمىس ىستەگەن», –  دەيدى جۋرناليست.

ايتا كەتەيىك, بۇگىن پرەزيدەنت قاسىم-جومارت توقاەۆ ولاف ءشولتستىڭ وتىنىشىمەن ۋكراينا توڭىرەگىندەگى جاعدايدى رەتتەۋگە بايلانىستى پىكىرىن جەتكىزدى,

– اسكەري تۇرعىدا رەسەيدىڭ جەڭىلمەيتىنى انىق. سوعىس بۇدان ءارى ءورشي بەرسە, بارشا ادامزاتقا, ەڭ الدىمەن, رەسەي-ۋكراينا قاقتىعىسىنا تىكەلەي قاتىسى بار مەملەكەتتەرگە سالدارى وتە اۋىر تيەدى. وكىنىشكە قاراي, ىستانبۇل كەلىسىمىن بەكىتۋدەن باس تارتىپ, تاتۋلاسۋعا قول جەتكىزەتىن وڭتايلى مۇمكىندىكتى ۋىستان شىعارىپ الدى. دەگەنمەن بەيبىتشىلىك ورناتۋعا ءالى دە مۇمكىندىك بار. ءتۇرلى مەملەكەتتەردىڭ بارلىق بەيبىت باستامالارىن مۇقيات قاراپ, اسكەري ءىس-قيمىلداردى توقتاتۋ تۋرالى كەلىسىمگە كەلۋ كەرەك. سودان كەيىن تەرريتوريالىق ماسەلەلەردى تالقىلاعان ءجون. بىزدىڭشە, قىتاي مەن برازيليانىڭ بەيبىتشىلىك جوسپارى قولداۋعا تۇرارلىق. مەملەكەتتەر باسشىلارى كەلەدى, كەتەدى. ال حالىق, اسىرەسە كورشىلەس حالىقتار بەيبىت ءارى ءبىر-بىرىمەن ءتۇسىنىسىپ ءومىر ءسۇرۋى كەرەك. قازاقستاننىڭ رەسەيمەن دۇنيە ءجۇزى بويىنشا قۇرلىقتاعى ەڭ ۇزىن شەگەندەلگەن شەكاراسى بار. ءبىزدىڭ ەلدەرىمىز اراسىنداعى ىنتىماقتاستىق ستراتەگيالىق سەرىكتەستىك پەن وداقتاستىق اياسىندا دامىپ كەلەدى. قازاقستاندىقتار ۋكراين حالقى مەن ونىڭ ءتول مادەنيەتىنە شىنايى قۇرمەتپەن قارايدى. قازاقستان مەن ۋكراينا اراسىندا ەشقانداي كەلىسپەۋشىلىك بولعان ەمەس. كيەۆتە ەلشىلىگىمىز ءالى دە جۇمىس ىستەپ جاتىر, – دەدى مەملەكەت باسشىسى.