جاڭالىقتار
«ۇرىپ-سوعىپ, اتىس قارۋىن قولدانعان»: الماتى تاۋلارىندا موتوتسيكلشىلەرگە شابۋىل جاسالدى
الماتى وبلىسى قاراساي اۋدانىنا قاراستى قاسكەلەڭ تاۋىندا مالشىلار موتوتسيكلشى-ەندۋريستەرگە شابۋىل جاسادى. بۇل تۋرالى Stan.kz اقپارات اگەنتتىگى حابارلايدى.
ولار موتوتسيكلشىلەرگە شابۋىل جاساپ, ۇرىپ-سوعىپ, اتىس قارۋىن قولدانعان. اتالعان ىسكە قاتىستى جابىرلەنۋشىلەر الماتى وبلىسىنىڭ پوليتسياسىنا ارىزدانعان.
كادرلاردان ات تىزگىندەگەن ەر ادامنىڭ الدىمەن موتوتسيكل جۇرگىزۋشىلەرىنىڭ ءبىرىنىڭ باسىنان سوققانىن بايقاۋعا بولادى. تاعى ەكى ادام قوسىلىپ, بايكەردى ۇرىپ-سوعىپ, جەرگە قۇلاتقان. شابۋىل جاساۋشىلاردىڭ ءبىرىنىڭ قولىندا كالاشنيكوۆ اۆتوماتىنا ۇقساس اتقىش قۇرالى بار.
الماتى وبلىسىنىڭ پوليتسيا دەپارتامەنتى اتالعان جاعدايعا قاتىستى تۇسىنىكتەمە بەردى.
«2024 جىلدىڭ 14 شىلدەسىندە الەۋمەتتىك جەلىلەر مەن WhatsApp مەسسەندجەرىنە جۇرگىزىلگەن مونيتورينگ بارىسىندا 13 شىلدەدە قاسكەلەڭ تاۋىندا تۇسىرىلگەن ۆيدەو انىقتالدى. وندا قولىندا مىلتىعى بار ءۇش ەر ادامدى بايقاۋعا بولادى. ولار بۇزاقىلىق نيەتپەن ءۇش موتوتسيكل جۇرگىزۋشىسىنە دەنە جاراقاتىن سالعان. اتالعان فاكتى قىلمىستىق كودەكستىڭ 293-بابىنىڭ 3-بولىگى (بۇزاقىلىق) بويىنشا تىركەلدى”, – دەلىنگەن حابارلامادا.
قازىر ۇلتتىق قاۋىپسىزدىك كوميتەتى قىزمەتكەرلەرى قىلمىسكەرلەردى انىقتاۋ جانە ۇستاۋ بويىنشا جەدەل-ىزدەستىرۋ شارالارىن جۇرگىزىپ جاتىر.
