جاڭالىقتار
ء«ۇش ساعات بويى سۋىق جۇك كولىگىندە قينادى»: قۇرىلىسشىلار وليگارح وتەمۇراتوۆتان قىسىم كورىپ جاتقانىن ايتىپ, پرەزيدەنتكە شاعىمداندى
فوتو: Stan.kz / مەردىگەر دانيار وماروۆ جانە بولات وتەمۇراتوۆ پەن ۇلى ءاليدار وتەمۇراتوۆ
3 جىل بۇرىن وتەمۇراتوۆتار وتباسىنىڭ ۆيللاسىن سالىپ بەرگەن قۇرىلىسشى دانيار وماروۆ قىلمىستىق ءىس بويىنشا ادىلەتسىزدىكتى توقتاتۋدى سۇراپ, قاسىم-جومارت توقاەۆقا جۇگىندى. ونىڭ ايتۋىنشا, ءاليدار وتەمۇراتوۆتىڭ قاراماعىنداعىلار ەكى جىلدان كەيىن مەردىگەرلەرگە 1,5 ميلليارد تەڭگەنى ۇرلادى دەپ ايىپ تاققان. ارتىنشا پوليتسەيلەر ەكى قۇرىلىسشىنى دانيار وماروۆقا قارسى كۋالىك بەرۋ ءۇشىن جۇك كولىگىندە قاماپ ۇستاپ, قىسىم كورسەتكەن. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.
بىلتىر 18 قاراشادا الەۋمەتتىك جەلىدە وماروۆ دانيار پەن الەكساندر باجەجا ادىلەتسىزدىك تۋرالى ايتىپ, ۇندەۋ جاسادى. ەكەۋى ءۇش جىل بۇرىن باسقا مەردىگەرلەرمەن بىرگە الماتىدا ءاليدار وتەمۇراتوۆتىڭ وتباسىنا ۆيللا سالعان جاۋاپكەرشىلىگى شەكتەۋلى سەرىكتەستىكتە 2021-2023 جىلدار ارالىعىندا جۇمىس ىستەگەن. مەردىگەرلەر جۇمىستى بولاشاق ۆيللا يەسىمەن جەكە كەلىسىمشارتقا ساي ىستەگەن.
بارلىق جۇمىس بەلگىلەنگەن مەرزىمىندە ورىندالىپ, اۆتورلىق جانە تەحنيكالىق قاداعالاۋدان وتكەن سوڭ قابىلدانعان كورىنەدى. الايدا ءۇيدىڭ قۇرىلىسىنان ەكى جىل وتكەن سوڭ 1,5 ميلليارد تەڭگە ۇرلادى دەپ ايىپتالعان.
ء«بىز, دانيار وماروۆ پەن الەكساندر باجەجا, سونداي-اق تاعى ءتورت ارىپتەسىمىز, وليگارحات پەن قۇقىق قورعاۋ ورگاندارىنىڭ تىعىز بايلانىسىنان زارداپ شەكتىك. ءاليدار بولات ۇلى وتەمۇراتوۆتىڭ قاراماعىنداعىلاردىڭ ارىزى بويىنشا, بىزگە 1,5 ميلليارد تەڭگە سوماسىندا قىلمىستىق ءىس قوزعالىپ جاتىر دەپ ەسەپتەيمىز. بىرىنشىدەن, بۇل سوما وبەكتيۆتى جانە كاسىبي ەسەپتەۋلەرمەن راستالماعان. سوندىقتان ءبىز بۇل ايىپتى ويدان شىعارىلعان دەپ سانايمىز. ەكىنشىدەن, بىزدە بۇل سومانىڭ ەشقانداي بولىگى – نە اقشالاي, نە باسقا تۇردە بولعان ەمەس. مەردىگەرلەرگە ارنالعان بارلىق تولەمدەر تەك وتەمۇراتوۆ بەكىتكەن مولشەردە تولەنىپ وتىردى. ۇشىنشىدەن, ءىس نەگىزدەلگەن سوت-قۇرىلىس ساراپتاماسى, ءبىزدىڭ ويىمىزشا, جالعان. ءىس-ماتەريالدارىندا ساراپتاما وبەكتىلەر جويىلعاننان كەيىن جۇرگىزىلگەنى تۋرالى جازىلعان. ياعني, جوق نىساندى قالاي زەرتتەۋگە بولادى?» – دەدى دانيار وماروۆ.
دانيار وماروۆتىڭ ايتۋىنشا, پوليتسيا قۇرىلىسشىلاردى قورقىتىپ, وتەمۇراتوۆتىڭ ىقپالىن مەڭزەگەن. بۇدان بولەك ول كەي جوعارى لاۋازىمدى قۇقىق قورعاۋ ورگان وكىلدەرى ءىستى وتەمۇراتوۆتىڭ پايداسىنا شەشۋ تۋرالى بۇيرىق الدى دەگەندى تىلگە تيەك ەتتى.
الايدا بۇل ۆيدەوۇندەۋدەن كەيىن قۇرىلىسشى 21 قاڭتاردا تاعى دا كومەك سۇراپ شىعادى. ونىڭ ايتۋىنشا, جاعداي وسىدان سوڭ شيەلەنىسىپ, ارىپتەستەرىن ماجبۇرلەپ قيناي باستاعان.
«وكىنىشكە قاراي, ادىلەتسىزدىك جالعاسىپ جاتىر. الدىڭعى ۆيدەوۇندەۋىمنەن كەيىن تەرگەۋ ءىسى ءتىپتى سۋبەكتيۆتى سيپات الىپ كەتتى. تەرگەۋ مەن پروكۋراتۋرانىڭ ارەكەتتەرى ازاماتتىق-قۇقىقتىق داۋلاردى قاساقانا قىلمىستىق ىسكە اينالدىرۋعا ۇقسايدى», – دەپ مالىمدەدى دانيار وماروۆ ءوز ۇندەۋىندە.
ونىڭ ايتۋىنشا, الماتى قالاسىنىڭ مەدەۋ اۋدانى پوليتسيا باسقارماسى مەن پروكۋراتۋراسى ەكى مەردىگەردى تۇتقىنداپ, قىسىم كورسەتكەن.
«مەدەۋ اۋدانى پوليتسيا باسقارماسىنىڭ تەرگەۋشىسى حاكبەرديەۆ, تيمۋروۆ جانە اۋداندىق پروكۋراتۋرا مەردىگەرلەردى قاماۋعا الدى. ۇستالعانداردى ءۇش ساعات بويى سۋىق جۇك كولىگىندە (اۆتوزاكتا) قاماپ, قىسىم كورسەتكەن. جالعان كۋالىك بەرسە, بوساتامىز دەپ ۇسىنىس جاساعان. بۇل تۋرالى ماعان ولاردىڭ جۇبايلارى حابارلاسىپ ايتتى, كومەك سۇرادى,» – دەدى وماروۆ.
دانيار قۇرىلىس تولىق جانە زاڭدى تۇردە ورىندالعانىن دالەلدەيتىن فوتو جانە بەينەماتەريالدار بار ەكەنىن اتاپ ءوتتى. بىراق تەرگەۋ بۇل دالەلدەردى ەلەمەي وتىر.
«8 جىل بويى بولات ءجاميت ۇلى وتەمۇراتوۆتىڭ ءارتۇرلى قۇرىلىس جوباسىندا ادال جۇمىس ىستەدىم. ارىستاعى جارىلىس پەن مىرزاكەنتتەگى سۋ تاسقىنىنان كەيىن ۇيلەردى قايتا سالۋعا اتسالىستىم. پرەزيدەنتتىڭ قولىنان «ەرەن ەڭبەگى ءۇشىن» مەدالىن الدىم. قۇرمەتتى بولات ءجاميت ۇلى, سىزگە دە جۇگىنەمىن. مەن جانە ارىپتەستەرىمنىڭ ءوز ءسوزىن ايتۋىنا مۇمكىندىك بەرىڭىز,» – دەپ ءوتىندى وماروۆ.
دانيار وماروۆ ادىلەتتى جاڭا قازاقستاننىڭ قۇندىلىقتارىنا سەنەتىنىن جانە ءوز اقيقاتىن قورعاۋعا دايىن ەكەنىن مالىمدەپ, ىشكى ىستەر ءمينيسترى مەن باس پروكۋروردى وبەكتيۆتى تەرگەۋ جۇرگىزۋگە شاقىردى.
بۇل ىسكە قاتىستى الماتى پوليتسيا دەپارتامەنتىنەن جاۋاپ الا المادىق. سونىمەن قاتار رەداكتسيا باس پروكۋراتۋراعا رەسمي سۇرانىس جىبەردى.
