ءۇشىنشى اەس شاردارا جاعاسىندا سالىنۋى دا مۇمكىن

فوتو:Dalanews.kz

اەس شاردارا جاعاسىندا سالىنۋى دا مۇمكىن. بۇل تۋرالى DALA INSIDE ارناسى جازدى, دەپ حابارلايدى qandastar.kz Dalanews.kz-كە سىلتەمە جاساپ.

«قىتاي سالاتىن ءۇشىنشى اتوم ەلەكتر ستانتسياسى شاردارا جاققا قويىلۋ مۇمكىن. جابىق ەسىك جاعدايىنداعى تالقىلاۋلاردا وسى نۇسقا كوبىرەك ايتىلا باستادى», — دەدى, DALA INSIDE دەرەككوزى.

ينسايدەردىڭ ايتۋىنشا, وڭتۇستىك ءوڭىر باسقالارعا قاراعاندا ەلەكتر ەنەرگياسىنىڭ تاپشىلىعىن قاتتى سەزىنۋدە. ال دەموگرافيالىق-ميگراتسيالىق بولجامدارعا ساي, 2030 جىلدارعا قاراي بۇل ماسەلە ءتىپتى ۋشىعادى. تۇركىستان وبلىسىندا جارىق گرافيكپەن ءوشىرىلىپ, بەرىلىپ وتىراتىن جاعدايعا تاپ بولۋىمىز مۇمكىن.

«نەگىزى جوسپار بويىنشا بالقاشتاعى ۇلكەن اەس «سولتۇستىك-وڭتۇستىك» جەلىسى ارقىلى وڭتۇستىكتەگى دەفيتسيتتى جابۋى ءتيىس ەدى. بىراق ونىڭ ۋاقىتىلى سالىناتىنىنا ۇكىمەتتىڭ ءوزى سەنبەي وتىر. سەبەبى روساتومنىڭ تۇركياداعى داعدارىسى ءبىراز نارسەگە كوزدى اشىپ بەردى. بالقاشتاعى قۇرىلىس قۇرىعاندا 20 جىلدىڭ ىشىندە سالىنىپ بىتەدى دەگەنگە دە ەش كەپىلدىك جوق. سوندىقتان قىتايدىڭ CNNC كورپوراتسياسى ارقىلى شاردارا جاققا ەكى HPR-1000 رەاكتورىن تەز ارادا قويىپ, ءموبيلدى اەس جاساپ الۋ يدەياسى لوگيكاعا سايىپ تۇر», — دەيدى ينسايدەر.

بىلتىر وڭتۇستىك وڭىرلەرگە 3,3 ملرد كۆت/ساعات ەلەكتر ەنەرگياسى جەتپەدى. ول تاپشىلىق مانەۆرلى قۋات ارقىلى رەسەيدەن يمپورتتالدى جانە وسى ءۇشىن قازاقستان رەسەيگە 100 ميلليارد تەڭگەدەن استام سومانى تولەۋگە ءماجبۇر بولدى. بيىلعى دەفيتسيت ودان دا كوپ بولۋى ءتيىس.

ەلدىڭ ەلەكتر بالانسىندا تۇركىستان وبلىسى, قىزىلوردا وبلىسى مەن شىمكەنت قالاسى باستى پروبلەماعا اينالىپ وتىر. ادام سانى تەز وسۋدە جانە جاڭا وندىرىستەر قاپتاپ اشىلۋدا. بارىنە مولىنان جارىق كەرەك. ايماقتاعى سۋ ەلەكتر ستانتسيالارى مەن كومىر ستانتسيالارىنىڭ قۋاتى جەتپەيدى. ەكىباستۇزداعى گرەس بارىنشا جىرتىقتى جاماعىسى كەلسە دە ونىڭ دا شاماسى جەتپەي جاتىر.

«باستىسى, قىتايلار اتوم ەلەكتر ستانتسياسىن تەز سالۋى ءتيىس. ەگەر 7 جىلعا ۇلگەرسە, ءبىز دەفيتسيت پروبلەماسىن ۋشىقتىرماي شەشە الامىز», — دەپ جازدى ارنا.