ۆيتسە-پرەمەر كىمدەر 4 كۇندىك جۇمىس اپتاسىنا اۋىسا الاتىنىن ايتتى

فوتو: halyq-uni.kz

پرەمەر-ءمينيستردىڭ ورىنباسارى تامارا دۇيسەنوۆا قازاقستاندا 4 كۇندىك جۇمىس اپتاسىنىڭ ەنگىزىلۋىنە قاتىستى پىكىر ءبىلدىردى, – دەپ حابارلايدى Aikyn.kz Massaget.kz-كە سىلتەمە جاساپ.

ءماجىلىس كۋلۋارىندا سوڭ ۆيتسە-پرەمەرگە «قازاقستاندا 4 كۇندىك جۇمىس اپتاسى ەنگىزىلگەنى حابارلانعان. قازىر بۇل ماسەلە قانداي دەڭگەيدە? مۇمكىندىكتى كىمدەر پايدالانا الادى?» دەگەن ساۋال جولداندى.

ۆيتسە-پرەمەر بۇل نورما زاڭدا بار ەكەنىن, قاي سالانىڭ ماماندارى بۇل مۇمكىندىكتى پايدالانا الاتىنىن ايتتى.

«بۇل ماسەلەنى قاراستىردىق, ەڭبەك كودەكسىندە ول بار. بۇل – جۇمىس بەرۋشى مەن جۇمىسشىنىڭ اراسىنداعى ءوزارا قاتىناس. مىسالى, قىستا قوناقۇيلەر قىزمەتكەرگە 4 كۇن جۇمىس ىستەۋگە مۇمكىندىك بەرە الادى. الايدا تۋريستەر كوپ كەلگەن كەزدە جۇمىس اپتاسىن 6 كۇنگە ۇزارتا الادى. بىراق 40 ساعاتتىق جۇمىس اپتاسى ساقتالۋى شارت. (4 كۇن جۇمىس اپتاسى نەگىزىندە – اۆتور) قىزمەت كورسەتۋ سالاسى مەن تۋريزم, قوناقۇي بيزنەسى جۇمىس ىستەي الادى», – دەدى تامارا دۇيسەنوۆا.