«يۋبكا كيگەن ەركەكسىڭ»: اتىراۋدا كۇزەتشىنى كەلەمەجدەگەن بلوگەرلەرگە قاتىستى قىلمىستىق ءىس قوزعالدى

فوتو: اينۇر بالاكەشوۆانىڭ فەيسبۋك پاراقشاسىنان

اتىراۋدا بلوگەرلەردىڭ قىسىنان كەيىن قايتىس بولعان كۇزەتشىنىڭ ىسىنە قاتىستى قىلمىستىق ءىس قوزعالدى. قازىرگى ۋاقىتتا سوتقا دەيىنگى تەرگەۋ امالدارى جۇرگىزىلىپ جاتىر, دەپ حابارلايدى qandastar.kz  Skifnews.kz اقپارات پورتالىنا سىلتەمە جاساپ.

بەلگىلى بولعانداي وزدەرىن بلوگەرمىز دەپ تانىستىرعان ءبىر توپ ادام اتىراۋداعى مەملەكەتتىك ساراپتاما ورتالىعىنا كەلگەن. ولار سول جەردەگى كۇزەتشىگە ءتىل تيگىزگەن.

اتىراۋ وبلىستىق پوليتسيا دەپارتامەنتىنىڭ مالىمەتىنشە, قىلمىستىق كودەكستىڭ 293-بابىنىڭ 2-بولىگى ( Fدامدار توبى, الدىن الا ءسوز بايلاسۋ ارقىلى جاساعان بۇزاقىلىق) بويىنشا ءىس قوزعالدى.

ەسكە سالا كەتەيىك, بۇعان دەيىن اتىراۋداعى “مەملەكەتتىك ساراپتاما ورتالىعى” مەملەكەتتىك مەكەمەسىنىڭ كۇزەتشىسى جۇمىس ورنىنداعى وقيعاعا بايلانىستى باسىنا قان قۇيىلىپ كوز جۇمعان ەدى. وقيعانىڭ ۆيدەوسىن قورعاۋشى اينۇر بالاكەشوۆا ءوزىنىڭ جەلىدەگى پاراقشاسىندا جاريالاعان.

مەملەكەتتىك ورگانعا كىرگىسى كەلگەن بلوگەرلەر جولىن بوگەمەك بولعان كۇزەتشىگە داۋىس كوتەرىپ, ارتىنشا بالاعاتتاعان. ولار كۇزەتشىنىڭ اياق كيىمىنە ءتيىسىپ, “سەن بومجسىڭ با?”, “سەن كىمسىڭ?”, “سەن ەركەك ەمەسسىڭ, بەلدەمشە كيىپ ال” دەپ ايتقان.