زارداپ شەككەندەر بار: تالدىقورعانداعى جەكە ۇيدە گاز جارىلدى

فوتو: قالالىق تجد

تالدىقورعان قالالىق كوپسالالى اۋرۋحاناسىندا جەكە ۇيدەگى گاز جارىلىسىنان زارداپ شەككەن تاعى ءبىر ادام كوز جۇمدى, دەپ جازدى qandastar.kz

وبلىستىق دەنساۋلىق ساقتاۋ باسقارماسىنىڭ حابارلاۋىنشا, 31 جەلتوقساندا تالدىقورعان قالاسىنىڭ شەتىندەگى ۇيلەردىڭ بىرىندە گاز جارىلىپ, اۋرۋحاناعا تۇسكەن 46 جاستاعى ايەل بۇگىن كوز جۇمدى. ايەلدىڭ دەنەسىنىڭ 96 پايىزىن كۇيىك شالعان.

“زارداپ شەككەن 7 ادامنىڭ ەكەۋى كوز جۇمدى. ولار ايەلى مەن كۇيەۋى. قازىر دەنەسىنىڭ 38-40 پايىزىن كۇيىك شالعان تاعى ءبىر ناۋقاس جانساقتاۋ بولىمىندە جاتىر, جاعدايى وتە اۋىر», – دەپ حابارلادى جەتىسۋ وبلىسىنىڭ دەنساۋلىق ساقتاۋ قىزمەتى.

وبلىستىق پوليتسەيلەر تۇتىنۋشىلاردىڭ ءومىرى مەن دەنساۋلىعىنىڭ قاۋىپسىزدىگىنە قويىلاتىن تالاپتارعا ساي كەلمەيتىن جۇمىستاردى ورىنداۋ نەمەسە قىزمەت كورسەتۋ فاكتىلەرى بويىنشا ادام ولىمىنە اكەپ سوقتىرۋ بابى بويىنشا قىلمىستىق ءىس قوزعالعانىن حابارلادى.

«تەرگەۋ زاڭعا سايكەس جۇرگىزىلۋدە, ونىڭ اياسىنداعى باسقا مالىمەتتەر ازىرگە جاريا ەتىلمەيدى», – دەپ اتاپ ءوتتى جەتىسۋ وبلىستىق پوليتسيا دەپارتامەنتى.