زارينا دياس يسپانيادا توپ جاردى

فوتو: قتف

قازاقستاندىق, الەمنىڭ 275-راكەتكاسى زارينا دياس تاۋستە (يسپانيا) ITF W35 ءتۋرنيرىنىڭ چەمپيونى اتاندى, دەپ جازدى qandastar.kz

جارىستىڭ 2-راكەتكاسى بولىپ تىركەلگەن قازاقستاندىق تەننيسشى فينالعا دەيىن ىركىلمەي جەتتى.
سوڭعى باسەكەدە زارينا الەمدىك رەيتينگىدە 446-ورىندا تۇرعان يتاليالىق ديلەتتا كەرۋبينيمەن چەمپيوندىق اتاق ءۇشىن كورتقا شىقتى.

ءبىرىنشى پارتيادا ز.دياس 3:0 ەسەبىمەن العا كەتتى. سودان كەيىن تاعى ءبىر برەيككە قول جەتكىزدى — 6:1.

ەكىنشى سەت برەيك الماسۋمەن باستالدى. ەسەپ 3:3 بولعان مەزەتتە قازاقستاندىق سپورتشى برەيك جاساپ, ءوز گەيمىن دە الدى — 5:3. الايدا كەرۋبيني تارازى باسىن تەڭەستىرىپ, تاي-برەيكتە ءساتتى وينادى — 7:6 (7:4).

ءۇشىنشى, شەشۋشى پارتيادا زارينا ايقىن باسىمدىلىق كورسەتتى — 6:1.

تارتىستى وتكەن ماتچ ەكى ساعاتقا سوزىلدى.

بۇل — جاراقاتىنا بايلانىستى ەكى جىلدىق ۇزىلىستەن كەيىن كورتقا 2024 جىلى ورالعان ز.دياستىڭ سودان بەرگى ITF دودالارىنداعى ءۇشىنشى تروفەيى.