جاڭالىقتار
زەينەتاقى قورى حابارلاما جاسادى
فوتو: enf.kz
2025 جىلعى 1 ماۋسىمداعى جاعداي بويىنشا بىرىڭعاي جيناقتاۋشى زەينەتاقى قورىنداعى شوتتاردا 37 ميلليارد تەڭگەدەن استام قاراجات سۇراۋسىز قالعان. قور وكىلدەرى بۇل قاراجاتتى كىمدەر الا الاتىنىن جانە ول ءۇشىن نە ىستەۋ قاجەت ەكەنىن ايتىپ بەردى, دەپ حابارلايدى qandastar.kz
بجزق-نىڭ اقپاراتىنا سايكەس, جالپىعا بىردەي بەلگىلەنگەن زەينەت جاسىنا جەتكەن تۇلعالاردىڭ تالاپ ەتىلمەگەن زەينەتاقى جيناقتارىنىڭ جالپى سوماسى – شامامەن 37,3 ملرد تەڭگە. بۇل سوما 264 695 جەكە زەينەتاقى شوتىندا (جزش) ساقتالعان. ونىڭ ىشىندە بجزق-نىڭ مەملەكەتتىك ورگانداردىڭ اقپاراتتىق جۇيەلەرىنەن العان مالىمەتتەرىنە سايكەس:
— 148 335 ادام قايتىس بولعان, ولاردىڭ زەينەتاقى جيناقتارىن مۇراگەرلەر تالاپ ەتە الادى;
— 59 800 ادام قازاقستاننان تىس جەرلەرگە تۇراقتى تۇرۋعا كەتتى;
— 56 560 ادام جاسىنا بايلانىستى زەينەتاقىلارىن رەسىمدەۋ ءۇشىن مەملەكەتتىك كورپوراتسياعا (تۇرعىلىقتى جەرى بويىنشا حقكو) ءالى ءوتىنىش بەرمەگەن.
ەستەرىڭىزگە سالا كەتەيىك, زەينەتاقى جيناقتارىنىڭ ەسەبىن بجزق جۇرگىزەدى, ينۆەستيتسيالانۋىن جالعاستىرادى جانە سالىمشىلاردىڭ جزش-دا الۋشىلار نە ولاردىڭ مۇراگەرلەرى (سالىمشى قايتىس بولعان جاعدايدا) تالاپ ەتكەنگە دەيىن ساقتالادى.
زەينەتكەرلىك جاسقا جەتۋىنە بايلانىستى زەينەتاقى جارنالارىنىڭ مىندەتتى تۇرلەرى ەسەبىنەن بجزق-دان زەينەتاقى تولەمدەرىن تاعايىنداۋ, سونداي-اق مەملەكەتتىك بيۋدجەتتەن بازالىق جانە ىنتىماقتى زەينەتاقى تاعايىنداۋ ءۇشىن الۋشىلار تۇرعىلىقتى جەرى بويىنشا «ازاماتتارعا ارنالعان ۇكىمەت» مەملەكەتتىك كورپوراتسياسىنا (حقكو) جۇگىنۋى قاجەت.
“بجزق-دا زەينەتاقى جيناقتارى بار ادام قايتىس بولعان جاعدايدا, ونىڭ وتباسى مۇشەلەرىنە رەسپۋبليكالىق بيۋدجەت تۋرالى زاڭدا ءتيىستى قارجى جىلىنا بەلگىلەنگەن 94 ەسەلەنگەن ايلىق ەسەپتىك كورسەتكىش مولشەرى شەگىندە قايتىس بولعان ادامنىڭ زەينەتاقى جيناقتارى قاراجاتى ەسەبىنەن, بىراق قايتىس بولعان ادامنىڭ جزش-دا بار قاراجاتىنان اسپايتىن مولشەردە جەرلەۋگە بىرجولعى تولەم جۇرگىزىلەدى. سونداي-اق زەينەتاقى جيناقتارى قازاقستان رەسپۋبليكاسىنىڭ زاڭناماسىندا بەلگىلەنگەن تارتىپپەن مۇراعا قالدىرىلادى. زەينەتاقى جيناقتارى بار ادام قايتىس بولعاننان كەيىن 6 اي ىشىندە ونىڭ مۇراگەرلەرى قايتىس بولعان ادامنىڭ زەينەتاقى جيناقتارى تۇرىندەگى مۇراگەرلىك م ۇلىكتى رەسىمدەۋ جانە مۇراگەرلىك قۇقىعى تۋرالى كۋالىك الۋ ءۇشىن نوتاريۋسقا جۇگىنۋگە ءتيىس. ەگەر ءوتىنىش بەرۋ مەرزىمى ءوتىپ كەتسە, مۇراگەرلىك قۇقىعىن قالپىنا كەلتىرۋ ءۇشىن سوت ورگاندارىنا جۇگىنۋ قاجەت”, – دەلىنگەن حابارلامادا.
