Zeınetaqy qory mańyzdy habarlama jasady

Biryńǵaı jınaqtaýshy zeınetaqy qory sońǵy kezde ınternettegi alaıaqtyq jıilep ketkenin málimdedi. Sonymen qatar salymshylarǵa birqatar eskertý jumystaryn jasady, dep habarlaıdy  qandastar.kz

Resmı aqparat jeke kabıneti nemese qordyń resmı saıtynda jarııalanady. Qor jeke málimetterdi suramaıdy

BJZQ baspasóz qyzmetiniń málimetinshe alaıaqtar ózderin memlekettik organdardyń nemese qarjy uıymdarynyń qyzmetkeri retinde tanystyryp, azamattardyń jeke málimetine qol jetkizýge tyrysady.

Qor qyzmetkerleri telefon arqyly qońyraý shalmaıdy. JSN, jeke kýálik nómiri, SMS rastaý kodtary, qoldanbalar men basqa qyzmetterdiń qupııa sózderi týraly málimetterdi berýińizdi ótinbeıdi, – dep jazylǵan habarlamada.

Sondaı-aq zeınetaqy qorynyń mamandary telefon arqyly yqtımal kúdikti áreketter nemese «qarajatty buǵattaý» qajettigi jaıly aıtpaıdy.

Al kez kelgen resmı aqparatty salymshynyń jeke kabıneti nemese qordyń resmı saıtynan alýǵa bolady. Salymshy qor fılıalyna da ózi baryp, qajetti aqparatty suraı alady.

Aldanyp qalmaý úshin ne isteý kerek

Qaýipsizdik sharalary:

telefon shalǵandar ózin «BJZQ» AQ nemese memlekettik qurylymdardyń qyzmetkeri retinde tanystyrsa da, qupııa derekterdi aıtpaý;

túsken aqparattyń durystyǵyn resmı derekkózder (www.enpf.kz saıty, 1418 baılanys ortalyǵy) arqyly tekserý;

kúmándi qońyraýlar nemese habarlamalar túsken jaǵdaıda baılanysty dereý úzip, alaıaqtyq áreket týraly quqyq qorǵaý organdaryna habarlaý.