«جاعىمپازدانباساڭ, كۇن كورسەتپەيدى»: قازاق بوكسىن كوككە كوتەرگەن باس باپكەرگە قيانات جاساعان كىم?

فوتو: stan.kz

YouTube جەلىسىندە «ۋاقىت كورسەتەدى» ارناسىندا قازاقستاننىڭ ەڭبەك سىڭىرگەن جاتتىقتىرۋشىسى, بوكستان ۇلتتىق قۇرامانىڭ بۇرىنعى باس باپكەرى تۇرسىنعالي ەدىلوۆپەن سۇحبات جاريالاندى.

سۇحباتتا پاريج وليمپياداسىنداعى بوكسشىلارىمىزدىڭ جاپپاي جەڭىلگەنى جونىندە ايتىلعان.

«وليمپيادادا باس باپكەر جاۋاپتى. ونداي ءىرى جارىسقا باراتىن مىقتىلاردى كىشىگىرىم حالىقارالىق جارىستارعا اپارماۋ كەرەك ەدى. شىمبەرگەنوۆتى نەگە اپارادى, وليمپياداعا? ول 12 جىل وليمپيادالىق قۇرامادا ءجۇر, ونىڭ ورنىنا جاس كۇشتەردى اپارۋ كەرەك قوي. ات تا 12 جىل شاپپايدى عوي. بۇل جەردە باس باپكەردىڭ ءبىلىمى كەرەك. ءبىر شاكىرتىن 3 وليمپياداعا اپارۋ دەگەن بولمايدى عوي. باسقا دا مىقتى بوكسشىلاردى ۇلكەن جارىستارعا تارتۋ كەرەك», – دەيدى ول.

ەلىشىلىك بوكس باسەكەسىندە شاكىرتتەرى ويسىراي جەڭىلسە دە, كەي باپكەرلەردىڭ نامىسقا تىرىسپايتىنىنا كۇيىنە سويلەگەن ەدىلوۆ كەزىندە وليمپيادادا 2 التىن 2 كۇمىس الىپ كەلسە دە, ءوزى ەسكەرۋسىز قالعانىن قىنجىلىسپەن جەتكىزدى.

«بىزدە قازىر بوكسكە بولىنەتىن قاراجات فۋتبولعا بولىنەتىن اقشادان 2 ەسە كوپ. باياعىدا بىزگە 15 بوكسشىعا, 2 جاتتىقتىرۋشى مەن 1 دارىگەرگە عانا اقشا ءبولىپ, بولاشاق چەمپيونداردى دايىنداتاتىن. ونىڭ وزىندە اۋەلى ءبىز ءوز اقشامىزبەن جاتتىقتىرىپ, ۇكىمەت بولگەن قارجىعا 2-3 ايدان كەيىن عانا قولىمىز جەتۋشى ەدى. قازىر شە? قازىر 100 بالا دايىندىق كەزەڭىندە جاتتىعىپ جاتىر. بىراق, ناتيجە جوق. ءبىز توكيو وليمپياداسىنان كەيىن-اق دابىل قاعىپ, قازاق بوكسىنداعى جۇيەنى تۇگەل وزگەرتۋىمىز كەرەك ەدى», – دەيدى تۇرسىنعالي ەدىلوۆ.

ۇلكەن سپورت پەن جەكە ومىرىندە كەزدەسكەن ءتۇرلى جايتتى ءسوز ەتە وتىرىپ, بەلگىلى باپكەر ەل ىشىندە ادامگەرشىلىك پەن ۇياتتىڭ جوعالىپ بارا جاتقانىن دا اشىنا ءسوز ەتتى.

«بىزدە كورەالماۋشىلىق باسىم. بىرەۋگە جاعىمپازدانباساڭ, كۇن كورسەتپەيدى. ال, مەندە ونداي مىنەز جوق. كەزىندە مەنى دە قىزعانىشپەن ۇلكەن سپورتتان شەتتەتكەن. وزبەكتەردە ۇيىمشىلدىق پەن تاربيە بار. ءبىر مىقتى شىقسا, بىردەن كوتەرمەلەپ, دەمەۋ بەرەدى. ارينە, ونداي ۇلتتان چەمپيوندار كوپتەپ شىعادى. بىزدە تاربيە جەتپەيدى», – دەپ قىنجىلدى تۇرسىنعالي باپكەر.

ومىردە كورگەن ادىلەتسىزدىكتەرىن قوزعاي وتىرىپ, ەدىلوۆ: «بالكىم, پاريجدەگى جەڭىلىستەرىمىز الدا ۇلكەن جەڭىستەرگە باستايتىن ساباق بولار دەپ ويلايمىن. قازاق بوكسىن كوتەرۋ ءۇشىن, بىزگە ۇلكەن وزگەرىستەر كەرەك, مۇمكىن, سول ءۇشىن بولىپ جاتقان جەڭىلىستەر شىعار» دەگەن وپتيميستىك وي دا ايتادى.

بۇل سۇحباتتا «ساقال» تاقىرىبى دا ءسوز بولدى.