«Jaǵympazdanbasań, kún kórsetpeıdi»: Qazaq boksyn kókke kótergen bas bapkerge qııanat jasaǵan kim?

Foto: stan.kz

YouTube jelisinde «Ýaqyt kórsetedi» arnasynda Qazaqstannyń eńbek sińirgen jattyqtyrýshysy, bokstan Ulttyq quramanyń burynǵy bas bapkeri Tursynǵalı Edilovpen suhbat jarııalandy.

Suhbatta Parıj Olımpıadasyndaǵy boksshylarymyzdyń jappaı jeńilgeni jóninde aıtylǵan.

«Olımpıadada bas bapker jaýapty. Ondaı iri jarysqa baratyn myqtylardy kishigirim halyqaralyq jarystarǵa aparmaý kerek edi. Shymbergenovti nege aparady, Olımpıadaǵa? Ol 12 jyl olımpıadalyq quramada júr, onyń ornyna jas kúshterdi aparý kerek qoı. At ta 12 jyl shappaıdy ǵoı. Bul jerde bas bapkerdiń bilimi kerek. Bir shákirtin 3 Olımpıadaǵa aparý degen bolmaıdy ǵoı. Basqa da myqty boksshylardy úlken jarystarǵa tartý kerek», – deıdi ol.

Elishilik boks básekesinde shákirtteri oısyraı jeńilse de, keı bapkerlerdiń namysqa tyryspaıtynyna kúıine sóılegen Edilov kezinde Olımpıadada 2 altyn 2 kúmis alyp kelse de, ózi eskerýsiz qalǵanyn qynjylyspen jetkizdi.

«Bizde qazir bokske bólinetin qarajat fýtbolǵa bólinetin aqshadan 2 ese kóp. Baıaǵyda bizge 15 boksshyǵa, 2 jattyqtyrýshy men 1 dárigerge ǵana aqsha bólip, bolashaq chempıondardy daıyndatatyn. Onyń ózinde áýeli biz óz aqshamyzben jattyqtyryp, úkimet bólgen qarjyǵa 2-3 aıdan keıin ǵana qolymyz jetýshi edi. Qazir she? Qazir 100 bala daıyndyq kezeńinde jattyǵyp jatyr. Biraq, nátıje joq. Biz Tokıo Olımpıadasynan keıin-aq dabyl qaǵyp, qazaq boksyndaǵy júıeni túgel ózgertýimiz kerek edi», – deıdi Tursynǵalı Edilov.

Úlken sport pen jeke ómirinde kezdesken túrli jaıtty sóz ete otyryp, belgili bapker el ishinde adamgershilik pen uıattyń joǵalyp bara jatqanyn da ashyna sóz etti.

«Bizde kórealmaýshylyq basym. Bireýge jaǵympazdanbasań, kún kórsetpeıdi. Al, mende ondaı minez joq. Kezinde meni de qyzǵanyshpen úlken sporttan shettetken. О́zbekterde uıymshyldyq pen tárbıe bar. Bir myqty shyqsa, birden kótermelep, demeý beredi. Árıne, ondaı ulttan chempıondar kóptep shyǵady. Bizde tárbıe jetpeıdi», – dep qynjyldy Tursynǵalı bapker.

О́mirde kórgen ádiletsizdikterin qozǵaı otyryp, Edilov: «Bálkim, Parıjdegi jeńilisterimiz alda úlken jeńisterge bastaıtyn sabaq bolar dep oılaımyn. Qazaq boksyn kóterý úshin, bizge úlken ózgerister kerek, múmkin, sol úshin bolyp jatqan jeńilister shyǵar» degen optımıstik oı da aıtady.

Bul suhbatta «saqal» taqyryby da sóz boldy.