جاڭالىقتار
«جالعان مالىمەت بەرۋدى توقتاتۋ كەرەك!» — دەپۋتات جۇمىسسىزدىق ماسەلەسىن ايتتى
ءماجىلىس دەپۋتاتى نارتاي سارسەنعاليەۆ پرەمەر-مينيستر ولجاس بەكتەنوۆكە دەپۋتاتتىق ساۋال جولداپ, جۇمىسسىزدىق ماسەلەسىن كوتەردى, دەپ جازادى Qandastar.kz.
دەپۋتاتتىڭ سوزىنشە, ۇلتتىق ستاتيستيكا بيۋروسى 2025 جىلدىڭ ءبىرىنشى توقسانىندا قازاقستان حالقىنىڭ 4,6 پايىزى, ياعني 451 515 ازامات جۇمىسسىز دەپ كورسەتكەن.
«بۇعان كىم سەنەدى? ءار قالاداعى جۇمىسسىز جاندار جينالاتىن جەتىم بۇرىشتى, تاباقتاي ديپلوممەن جۇمىس تاپپاي تابانىنان تاۋسىلعان جاس مامانداردى ءبارىمىز كورىپ ءجۇرمىز عوي.
مەنىڭ قولىمدا 16 مامىردا باسىلعان رەسمي دەرەك بار, مۇندا قازاقستان حالقىنىڭ سانى 20 261 486 ادام دەپ كورسەتىلگەن. سونىڭ 11 496 447–سى ەڭبەككە قابىلەتتى دەپ جازىلعان. ياعني ولار جۇمىس ىستەۋى قاجەت», — دەدى ول.
ونىڭ سوزىنشە, قازاقستاندا زەينەتاقى جيناعىنا كوك تيىن اۋدارىلماعان جانە الەۋمەتتىك اۋدارىمدارى مۇلدەم جوق حالىق سانى 5 244 664 ادامعا جەتكەن.
«ەندەشە قازاقستاندا 11,5 ميلليون ادام ەڭبەككە قابىلەتتى بولسا, ونىڭ 5,2 ميلليونىندا الەۋمەتتىك اۋدارىم مۇلدەم جوق بولسا, دەمەك ازاماتتارىمىزدىڭ تەڭ جارتىسى جۇمىسسىز دەمەسكە امال بار ما? جۇمىسسىزدار سانى 4,6 پايىز دەگەن دەرەكتىڭ شىندىققا سايكەس كەلمەيتىنىنە وسى دالەل ەمەس پە? سوندىقتان ەلدەگى جۇمىسسىزدىقتى جويامىز دەسەك الدىمەن جالعان مالىمەت بەرۋدى توقتاتۋ كەرەك! سونىڭ سالدارىنان حالىقتى جۇمىسپەن قامتۋعا ارنالعان باعدارلامالارعا بەرىلگەن قاراجات ماقساتسىز جۇمسالىپ جاتىر. وعان جوعارى اۋديتورلىق پالاتانىڭ ەسەبى دالەل. دەرەك كەلتىرەيىن, 2024 جىلدىڭ 10 ايىندا حالىقتى جۇمىسپەن قامتۋعا ارنالعان سۋبسيديالىق 6 باعدارلاماعا 180 031 ادام قاتىسىپتى. ولاردىڭ ارقايسىنا اي سايىن بيۋدجەتتەن اقشا تولەدىك! سوڭىندا سونىڭ 26 194-ءى عانا تۇراقتى جۇمىسقا ورنالاسقان», — دەيدى ول.
دەپۋتات «جاستار پراكتيكاسى» باعدارلاماسىنا 2024 جىلى 33 300 قازاقستاندىق قاتىسقانىن, باعدارلاما تارتىبىنە سايكەس ولاردىڭ ارقايسىنا ايىنا 117 960 تەڭگە تولەنگەنىن مالىمدەدى. سوعان قاراماستان تەك 7400 ازامات جۇمىسقا ورنالاسقان.
«قازىر ەلىمىزدە 5,7 ميلليون جاس بار, سونىڭ 3,7 ميلليونى ەڭبەككە قابىلەتتى. ەڭبەك مينيسترلىگى 2024 جىلى جاستاردى جۇمىسپەن قامتۋعا ارنالعان باعدارلامالار ارقىلى 236 037 جاس قازاقستاندىقتى قىزمەتكە تۇرعىزدىق دەپ ەسەپ بەردى. بىراق بىلتىر تەك 203 607 جاس ازامات قانا زەينەتاقى قورىنا اۋدارىم جاساعان. قالعان 33 مىڭ جاستىڭ الەۋمەتتىك تولەمدەرى قايدا? راسىندا ولار جۇمىسقا تۇردى ما, جوق پا? الدە جاستار جالعان ستاتيستيكانىڭ قۇربانىنا اينالدى ما? نەمەسە مەملەكەتتىك باعدارلاما ارقىلى جاستاردى الەۋمەتتىك اۋدارىمدار جاسالمايتىن كۇماندى جۇمىسقا تۇرعىزدى ما جاۋاپتى ورگاندار? مۇنىڭ بارلىعى جوعارى اۋديتورلىق پالاتىنىڭ ەسەبىمەن دالەلدەنگەن دەرەكتەر…. ءبىز ءوزى كىمدى الداپ ءجۇرمىز سوندا?» — دەپ اشىندى ول.
