«Jalǵan málimet berýdi toqtatý kerek!» — depýtat jumyssyzdyq máselesin aıtty

Májilis depýtaty Nartaı Sársenǵalıev premer-mınıstr Oljas Bektenovke depýtattyq saýal joldap, jumyssyzdyq máselesin kóterdi, dep jazady Qandastar.kz.

Depýtattyń sózinshe, Ulttyq statıstıka bıýrosy 2025 jyldyń birinshi  toqsanynda Qazaqstan halqynyń 4,6 paıyzy, ıaǵnı 451 515 azamat jumyssyz dep kórsetken.

«Buǵan kim senedi? Ár qaladaǵy jumyssyz jandar jınalatyn jetim buryshty, tabaqtaı dıplommen jumys tappaı tabanynan taýsylǵan jas mamandardy bárimiz kórip júrmiz ǵoı.

Meniń qolymda 16 mamyrda basylǵan resmı derek bar, munda Qazaqstan halqynyń sany 20 261 486 adam dep kórsetilgen. Sonyń 11 496 447–si eńbekke qabiletti dep jazylǵan. Iaǵnı olar jumys isteýi qajet», — dedi ol.

Onyń sózinshe, Qazaqstanda zeınetaqy jınaǵyna kók tıyn aýdarylmaǵan jáne áleýmettik aýdarymdary múldem joq halyq sany 5 244 664 adamǵa jetken.

«Endeshe Qazaqstanda 11,5 mıllıon adam eńbekke qabiletti bolsa, onyń 5,2 mıllıonynda áleýmettik aýdarym múldem joq bolsa, demek azamattarymyzdyń teń jartysy jumyssyz demeske amal bar ma? Jumyssyzdar sany 4,6 paıyz degen derektiń shyndyqqa sáıkes kelmeıtinine osy dálel emes pe? Sondyqtan eldegi jumyssyzdyqty joıamyz desek aldymen jalǵan málimet berýdi toqtatý kerek! Sonyń saldarynan halyqty jumyspen qamtýǵa arnalǵan baǵdarlamalarǵa berilgen qarajat maqsatsyz jumsalyp jatyr. Oǵan Joǵary aýdıtorlyq palatanyń esebi dálel. Derek keltireıin, 2024 jyldyń 10 aıynda halyqty jumyspen qamtýǵa arnalǵan sýbsıdııalyq 6 baǵdarlamaǵa 180 031 adam qatysypty. Olardyń árqaısyna aı saıyn bıýdjetten aqsha tóledik! Sońynda sonyń 26 194-i ǵana turaqty jumysqa ornalasqan», — deıdi ol.

Depýtat «Jastar praktıkasy» baǵdarlamasyna 2024 jyly 33 300 qazaqstandyq qatysqanyn, baǵdarlama tártibine sáıkes olardyń  árqaısyna aıyna 117 960 teńge tólengenin málimdedi. Soǵan qaramastan tek 7400 azamat jumysqa ornalasqan.

«Qazir elimizde 5,7 mıllıon jas bar, sonyń 3,7 mıllıony eńbekke qabiletti. Eńbek mınıstrligi 2024 jyly jastardy jumyspen qamtýǵa arnalǵan baǵdarlamalar arqyly 236 037 jas qazaqstandyqty qyzmetke turǵyzdyq dep esep berdi. Biraq byltyr tek 203 607 jas azamat qana zeınetaqy qoryna aýdarym jasaǵan. Qalǵan 33 myń jastyń áleýmettik tólemderi qaıda? Rasynda olar jumysqa turdy ma, joq pa? Álde jastar jalǵan statıstıkanyń qurbanyna aınaldy ma? Nemese memlekettik baǵdarlama arqyly jastardy áleýmettik aýdarymdar jasalmaıtyn kúmándi jumysqa turǵyzdy ma jaýapty organdar? Munyń barlyǵy Joǵary aýdıtorlyq palatynyń esebimen dáleldengen derekter…. Biz ózi kimdi aldap júrmiz sonda?» — dep ashyndy ol.